香港越野錦標賽: 西貢西郊野公園 (灣仔) ~ 10km

中秋節當晚, 四點鐘起身, 又要踏上征途.

正好可以欣賞吓中秋月色.

一個星期內, 第三次晨早起身, 又係經過哩條路.

今次唔再搭頭班車巴士, 因為會趕唔切, 而要搭尾班車通霄巴士, 轉頭班車地鐵先得.

因為哩個賽事係喺 [灣仔] !   (同日真係有另一 4km 賽事喺 [香港島灣仔] (Wan Chai), 不過, 我參加嘅賽事係喺 [西貢灣仔] (Wan Tsai).

由喺 [西面嘅東涌], 過去 [東面嘅西貢], 其實真係幾遠.

搭完尾班車通霄巴士, 可以食個早餐先搭頭班車地鐵.

四點鐘起身, 五點鐘搭通霄巴士, 六點半喺彩虹站地鐵搭大會旅遊車.

七點半喺西貢黃石碼頭, 搭約十分鐘船, 就去到對岸 [灣仔] 嘞 !

由於前一晚係中秋節, 所以營地有好多人露營.

去到嘅時候, 大會公佈氣溫係 25C, 郊外有風吹吓, 的確係好清涼好爽.

我哋算要早起身去到跑步, 大會工作人員其實比我哋更早.

仲要搬咁多嘢上船過去, 又要幫我哋安排, 其實都要處理好多嘢.

攞咗號碼布, 攞埋紀念 T-shirt, 時間尚早.

當日係有 5km 賽, 俾青年組參加, 所以有好多後生仔女, 同家長老師過嚟參賽.

而成人組 10km 賽, 要九點半先起跑, 所以仲有個幾鐘時間熱身加影相.

九點鐘 5km 賽起跑, 跑兩個圈.

http://www.hkaaa.com/hkaaa/event/event/Year2008/XC08/Map-Course.pdf

由於仲有半個鐘先到我起跑, 所以試吓影啲相睇吓.

由於係 [香港業餘田徑總會] 安排嘅賽事, 大會亦有記者同攝影師.

(不過, 過咗一日有多, 仲未有成績公佈, 又未有相睇.)

青年組其實有唔少勁人, 當中應該有好多係學校田徑組, 我曾經都試過有兩三次同佢哋一齊比賽過, 實力唔講得笑.

下圖係第一個跑完第一圈, 最後佢亦係冠軍, 十九分鐘多少少已經跑完 5km.

影咗啲相, 之後就到自己寄存行李, 準備起跑.

以前都試過跑啲類似嘅越野賽, 要上山落斜, 自己唔係話好得.

頭兩圈堅持到 [繼續跑住] 上山, 但係到第三四個圈已經唔得嘞.

我哋要跑四圈, 我自己大約計, 每個囤時間係: 15min 17min 18.5min 17min.

第三個圈嘅時候, 已經俾人超前咗我一個圈.

我合計用咗約六十七分鐘半完成 2.5km x4.

時間唔係好緊要, 當係一個練習賽, 哩度雖然遠啲, 但係環境唔錯.

如果下次係嚟露營釣魚, 咁都幾好玩.

因為我跑得慢, 反而跑完咗抖咗一陣, 睇埋頒獎, 就差唔多要走嘞 !

回程嘅時候, 見到好多人玩風帆.

當日新聞, 話有位後生仔, 當日喺石澳過中秋節後, 落水遇到意外. 真係可惜 !

哩次返屋企我都發覺自己有隻腳趾, 腳趾甲下出血瘀咗, (早幾個月跑步都有一隻瘀咗, 幾個月先散晒), 都唔知幾時撞親整親, 不過哩啲都係小事, 冇跌親冇扭親就可以嘞 !

郊遊玩樂嬉山嬉水等等, 真係要顧及安全先好呀 !