德國製運動手錶

[工欲善其事, 必先利其器] ~ 雖然我都好同意哩句說話, 但係對於跑步而言, 我又覺得暫時未去到嗰個 level, 簡單有效用又有保護性質嘅基本用品, 就已經可以.

最初跑步好想有對跑鞋, 嗰陣時成日暗示明示家姐陪我去買, (最好就送埋俾我), 但係就等咗好耐都冇. (其實唔係話貪佢幾百蚊, 而係有人送嘅話, 會跑得醒神啲.) (不過, 最後係女朋友送嘅, 跑得應該更加勁 !)      http://hk.myblog.yahoo.com/duckduck-day/article?mid=2561

跑咗一段時間, 其實需要一隻手錶, 唔駛暗示明示, 女朋友都送咗一隻 CASIO 跳字錶俾我, 喺渣打十公里隆重登場.

最近哩排 [社長] 唔只一次話有隻幾好幾抵嘅運動計時錶, 最後都係平平哋 $180 買嚟試吓嘞 !

上一次有睇過貨, 聽講話有德文字, 雖然我係學過德文, 但係我唔係識好多生字咋 ! 今日收到隻錶, 原來錶面嘅唔係英文, 而係德文 ! 雖然見到德文, 有啲親切感, 但係我又覺得有啲陌生.      睇嚟我都係要得閒查吓字典, 唔係俾人問起唔識就好瘀.  

基本手錶一隻, 錶面好大, 但係啲字好細, 跑步唔戴眼鏡, 應該真係好難睇得清楚. 仲有條 [心跳帶] 測心跳, 百幾蚊買到隻好多用途嘅手錶.

隻錶仲有乜嘢用途同點樣玩 ? 本來以為返屋企睇說明書, 慢慢摸都會識得攪掂隻錶, 估唔到說明書淨係得德文字, 冇英文版本, 真係 [書到用時方恨少].