Day 8 ~ Switzerland Interlaken + Jungfrau ~ 20-6-2008

預訂晒旅館之後, 先再安排行程, 發覺少女峰淨係得一日時間, 其實真係好少, 因為除咗少女峰之外, 山腰山間或者湖附近, 都有好多好地方.

哩日算早起身, 經過擒晚行過嘅主街, 就去到另一個車站 Interlaken Ost, 哩日嘅天氣其實都好好.

趕到車程, 由 Interlaken Ost 去 Grindelwald, 火車沿途風景都唔錯.

Grindelwald 附近有啲細小店舖, 望落去山坡下面, 就係瑞士山區風景嘞 ! 我哋行行吓見冇特別其他景點, 就行返轉頭搭吊車上 Männlichen.

吊車上到去 Männlichen, 就已經有 2222m 咁高, 同雪山嘅距離又近咗好多. 雖然我哋係六月夏天去少女峰, 但係已經見到有少少溶剩咗嘅雪嘅蹤跡嘞 !

瑞士上少女峰, 除咗乘搭各種交通工具, 點都要試吓自己親自行, 我哋揀咗比較簡單嘅路程, 就係由 Männlichen 行去 Kleine Scheidegg, 標高由 2222m 行落到 2061m, 路程約個零鐘, 唔算辛苦, 亦係一種好好嘅體驗.

個零鐘嘅路程, 比較驚險嘅係有時行山徑會俾啲雪阻住, 雖然已經有人鏟雪或者好多途人行過, 但係行上雪面, 始終要小心啲, 我哋冇帶行山杖, 而我就用相機腳架做支撐幫幫手.

雖然係喺雪山附近, 但係烈日當紅嘅夏天, 唔覺得凍又唔算好熱, 途中停低食吓嘢影吓相, 向 Kleine Scheidegg 進發.

Kleine Scheidegg 算係各行山路線嘅一個匯集點, 因為喺哩度, 就可以再坐登山列車直上少女峰. 哩條鐵路已經有差唔多一百年歷史, 如果用 Swiss Pass 嘅話, 都係需要另外再加錢架 !

當日上到少女峰, 記得大約係 -2C 至 2C, 3454m 嘅 Jungfraujoch (少女峰車站) 已經係 Top of Europe, 車站可以去到嘅最高雪山位置.

哩度除咗睇三個雪山峰 Eiger / Mönch / Jungfrau, 仲有就係睇冰川, Aletsch Glacier.

觀景台 Sphinx Terrace (3573m) 可以睇到 Eiger / Mönch / Jungfrau, 但係其實我到而家都唔係好分得清楚嗰三個雪山嘅外貌. 望落雪山下面, 啲人仔喺度有各種唔同活動.

可以坐滑雪板滑落山, 亦都有坐吊索. 不過當日我哋係下晝去, 未玩就已經收檔囉.

哩個地方, 雖然平平無奇, 但係對我嚟講, 就係一個好重要嘅地方, 因為我就係喺哩度附近位置...... 求婚.    

另外仲可以入冰宮, 同埋去另一個地方影相睇冰川, 記得要買埋明信片打郵印寄出.

上咗少女峰幾個鐘一個下晝, 話咁快就要走要落山囉.

落山經另一個方向, 去另一個著名景點地 Lauterbrunnen, 哩度有個 Staubbach Falle, 係一個好似馬尾咁嘅瀑布, 其實附近都有另一個 Trümmelbach Falle, 聽講可以近距離接觸瀑布, 但係就比較遠, 今次去唔到囉.

Lauterbrunnen 就係另一個可以選擇留宿嘅地方, 如果住喺哩度嘅旅館, 對正哩個 [馬尾瀑布] 就好囉 !

哩晚我哋就喺 [馬尾瀑布] 附近, 飲啤酒食道地芝士火鍋.

食埋晚飯九點幾, 開始天黑, 回程搭火車返去 Interlaken.

返到 Interlaken Ost 車站, 沿路靜靜哋行返旅館, 仲可以 window shopping, 影影相.

如果第時再嚟少女峰, 一定會預多啲時間, 悠閒啲享受少女峰雪山美景, 或者喺 Interlaken 兩邊湖區欣賞美景, 再次回味哩一日.