天水圍長跑 ~ 8km

五月馬鞍山 8km 賽, 今個月就到元朗 8km, 地點係天水圍濕地公園附近.

(為咗分辨之前 [元朗長跑] 6km, 不如改叫 [天水圍長跑] 8km 啦 !)

七點半起跑, 最後決定行去美孚搭西鐵.

慢慢行去美孚, 搭唔到頭班西鐵, 十分鐘一班車, 搭第三班.

去到比較遲, 已經係七點, 唔該晒有哥同健康跑步社朋友之前幫手攞號碼布同晶片, 跟住即刻就要換衫. 原來唔係喺濕地公園跑, 而係封路跑馬路, 要喺流動厠所換褲, 勉強 okay 啦 !

擒晚半夜兩點都仲未瞓, 聽到行雷落大雨, 今日就陰陰天, 但係就好濕熱吓, 起跑頭一段就精神啲, 但係跑咗 1-2km 之後, 就開始慢落嚟, 去到 3km 處, 時間都大約仲係 15 min 多啲.

但係今日都係冇乜動力, 而且上次咁辛苦, 家姐又暈過, 自己都係小心啲好, 唔好咁搏, 而且起跑時唔係企頭位, 個鬥心好似都係差少少咁, 本來諗住跟一位健康跑步社師姐跑, (佢之前復活跑成績快過我少少, 我可以以佢為目標), 但係起跑之後就唔見咗, 所以個人都懶懶哋咁.     (其實主要因素都係天氣熱, 哩樣嘢可以賴, 另一因素係之前有成十日冇跑, 最近先跑返, 所以狀態都唔係咁好.)

沿途社長有哥, 間中有追上嚟影相, 唔該晒 ! 跑到去 6-7km 階段, 嗰位師姐終於過頭, 本來想跟貼啲, 但係追唔上, 最後上斜之後快咗少少, 但係都追唔返囉. 今日嘅成員係 PW, 慢過上次馬鞍山 8km 慢咗約三分半鐘, 大約 45分半多啲完成.

完成賽事後休息, 見到部份以前見過嘅跑友, 今日又再識多幾個, 另外一樣特別嘅係今日有見到視障人士由領跑員陪同跑步, 其實佢哋都好有毅力跑得好好, 其中一位仲有得獎添 ! 而健康跑步社今日亦都首次有兩名女將得獎. 恭喜晒 !

其後等頒獎儀式, 太陽已經出嚟, 本來瞓得少休息唔夠, 真係有啲攰, 好曬對眼好辛苦, 頒獎之後一齊去飲茶.

最後仲帶其中一位視障朋友順路搭西鐵搭車, 可以幫到人而將來更或可以一齊跑步, 覺得好開心, 佢哋有十三名視障運動員, 將會喺月尾出戰吉隆坡長跑, 包括 10km 或半馬賽事, 希望佢哋都可以攞到好成績啦 !