搵工的迷思

近排又覺得份工實在好無謂。想試下第二d，但係諗下諗下又覺得自己好似有乜料到。想搵工，都要有人請至得架 。

畢業前仲自認係一代精英，而家就得返一袋精蟲。究竟呢幾年做過d 乜？Coco 都話要做媽媽生，點解我冇d 咁清晰的目標呢？

有朋友叫我跳出黎。唉，如果好清楚自己想點就可以義無反顧唔理幾多錢都跳完先算，但係衰在就係冇。咁唔睇理想，唯有睇物質啦 。而家拿住碌街大機構五年經驗，未見工先打五十大板 ，人地都諗你做乜q 要跳出黎啦，唔 discount你當你係fresh grad計己經算好，仲想有幾多錢？咁冇返咁上下人工又點跳？唔駛交租咩 ，跳老舞就得。仲要有人肯請至得喎。

不過真係唔知出面行情如何，究竟一個好人好姐大學畢業 ，在職場打拼五年之後應該值幾多錢呢？ 做多十年又應該係幾多錢呢？ 有時同人傾，五年過兩萬好似好正常，但係又有好多其實都冇呢個價喎 。我又以為好多人三四十歲去到四萬附近又會啜住左，好難再向前行 ，點知聽下又有好多直上六七萬，跟住就十萬喎。當然行業 、公司等都好大影響，咁最最average的應該會點呢？

我又同唔同人講過，話我呢便如果冇乜大煲野唔好彩的話 ，正正常常四十幾歲有五至六萬啦，結果反應真係好唔同。有d 就話正，不過唔知係口講話正定係真係覺得正，有 d 就唔出聲不過從表情知道佢地覺得係低囉。

其實點解人工要咁秘密？大家講出黎分享下唔好咩？又要自己唔講 ，又要想人地講；口又唔問，但係心又估估下；又想套人講 ，但係又唔想俾人知你套緊佢講，實在係太煩了。定係根本人人都唔介意講，不過又以為其他人介意講，所以唔夠膽問？定係其實人人都好介意講呢？但係，我地又唔能夠問左人你係介意定唔介意，等人話唔介意先至再問。實在係太煩了。

asymetric information 就這樣因為大家想知又唔問而形成了。俾人壓價，原來都係咎由自取。我冇介意過喎，可唔可以俾返高d 人工我？

(圖乃係新疆一維吾爾姑娘，佢其實係賣提子的，都要轉形著做埋model，搵食艱難呀)