SALOMON 行山熱身賽2008

今早玩東哥既Salomon 36.6K 賽事，氣溫26度，8:30AM起步，諗住晏D好熱，又唔係喎！四粒幾鐘比賽氣溫都冇乜提升。

CP1: 北潭涌齋跑馬路往北潭凹，時間用左15'22，同舊年頭段時間差唔多。

CP2: 一對鬼佬(二人組)及華人後生仔(個人組)一支箭前面快放，好快！有天文台話我知佢地連上石級都跑，我則暫列第四，起步冇耐，當然有氣有力。時間：1:12
落斜水浪窩時係我後面有個後生仔(24歲)迫得我好緊，搞到我連到check point冷靜下睇睇有乜飲有乜食都唔得，拿拿淋再起步往CP3。

CP3: 條後生仔原來上斜或上石級好慢，衹係落斜同平路會好快，我一路 lead 到馬鞍山頂，望後面見條友距離我成100米有多，應該冇咁快追到黎。去到萬里長城有天文台同我講前面個華人後生仔Lead左我成10分鐘，睇怕都冇乜機會捉佢，keep住上到基維爾，當時我開始速度減慢，比後面個後生仔界左，位列第三，時間:2:00。過左沙田坳後，一路都追唔到前面，自己氣力都用得八八九九。

最後上到氣象站附近，見翻前面位列第二個後生仔，一路都同佢keep住100米左右，最後2K，係發揮小宇宙既show time，開始作最後衝刺，最後1K，界低左個後生仔，佢全無招架能力，仲打手勢叫我過，因為佢小腿抽筋。最後500米見到前面位列第一個後生仔，嘩！對眼即時發光，佢爆得好離譜喎！同佢相距不足100米，副偈開到行，追！追！追！佢望返轉頭，見有追兵，佢加快腳步，最後都係追唔到，輸幾秒(大會公佈相差16秒，我肯定冇16秒，最多2-3秒)得亞軍，時間 4:38

時間幾滿意架，舊年冠軍 4:42 ，前年鍾文輝4:39第三，原因係今日天氣好。

大會安排是日賽事都恰當：

-: check point提供水和佳得樂、香蕉、梨、麵包。如果有埋Power Gel 更好，努力D搵埋贊助喇！人地中沿岸都有Power Gel取。

-: 終點設在停車場，沒有樹蔭、沒有好的歇息地方，想搵個坐得舒服D的地方都冇，想拉筋、想抖抖都唔得。

-: 如果 St.John 有埋帳篷按摩服務就正。

頒完獎後同Popo及健行友齊齊行上金山到城門散band，執多幾K，剛剛夠一個馬拉松。

老友寶寶得獎第四：










禮品：
30 lite:


水袋


帽：


獎杯：