2009 3rd Shatin Mixed Terrian Race

     上星期玩完北潭涌actionasiaevent，上山行澗跣到攤攤腰的賽事，雖然艱苦但好好玩，今個禮拜就去左沙田玩X-country 9K混合賽，所謂混合，即係包括：上斜、落斜、上樓梯、山路、石路(青台石勁跣)、平路5K，尋日落完大雨，好在晚上同今朝冇落，如果唔係仲難跑，氣溫廿度，好理想。

     東馬回來後就感冒三星期，由高戰鬥力下滑到無心機跑的狀態，呢個調整期都唔知要維持幾耐，好在進入賽季抖暑時期，呢類賽事就當fun run玩玩，唔比壓力，冇期望，完成返終點就算。

     起跑都感覺唔太順，K零上斜上梯級，尚算跟到前列跑手，之後慢慢被放離，落青台石路早有準備，穿定防滑跑山鞋，但呢段路都係得K零，之後的落斜同平路就好蝕底，對鞋好重，唔係幾好飛，呢段就比人界，好慘！但大致都估到身處名次，數落都危危呼！

    最後1K先至係戲肉，當時李秉新殺上超前，跟住馮士元跟住，嘩！佢兩個同我都係同組，比佢地過咪連跌兩名？分分鐘冇獎，最後500米我首先發難，急步搶上，越過兩位，副偈開行晒，最後100米，馮士元又殺上並排，佢衝得好行，好快，我早爆上去佢比我遲爆，我頂唔順，率之輸比馮士元兩秒，我又快過李秉新三秒，後黎出成績才知自己得第八，執到個獎尾，勁好彩！










真係唔好意思，去左沖涼，七缺一。


麻煩蓮姐代領。


舍友五人落場，成績算係咁。