向世界出發 完結篇 好歌獻給自己

      朋友知我要出埠半個月,到一個陌生國度工作,怕我悶,送我一份旅遊必備的旁身禮物:一大堆的老歌和老節目。卻苦無合適的播放工具,在我的櫃桐裡能找到的,是一部CD機。

「而家仲邊有人用呢啲石器時代嘅嘢架老豆。」兩個女兒一邊嘲笑我,一邊給我一個第一代ipod:「啱你用呀老豆,橫掂部機都殘殘哋,你用完唔使比返我,你睇我幾錫你!」經過一番擾攘,朋友終於在我出發前搞掂,交到我手還要教三五七次，我才勉強懂得如何操作。

曾經想過:「唔使一定識學點用個ipod啫,唔聽又唔使死嘅。」但又覺得不該辜負朋友一番好意,只好勉為其難,認認真真學懂操作它。心中安慰自己:「總之就全程唔用咪冇事囉。」

由香港出發,第一程先到東京,然後轉機往墨西哥城,幾乎用上一日時間,機上電影都看過了,又未疲倦,無聊地,拿出ipod試用:「咦,又唔係咁難用啫。」

朋友幫我將廿多年前我在電台做的節目都放到ipod裡,一個人在黑漆的長途機艙,聽住當年的節目,當年的歌曲,當年的自己,別有一番滋味在心頭:我說過做節目只供自己欣賞,懶理旁人卻承蒙大家錯愛。於是,這些年來,不斷挖空心思去討好大家,早已忘記如何討好自己。一次長途飛行,一個快要報銷的ipod,一堆廿多年前的陳年電台節目,正是補償討好自己的最佳時機。

music everywhere in cuba...