賣旗

自從某一次星期六係街同大佬B買過一次旗之後，佢就愛上左買旗

每逢見到有人賣旗，我地都會衝埋去

為既就係果一張貼紙

雖然都解釋過比大佬B知買旗既作用，不過睇黎佢都係對於將貼紙特別情有獨鐘

幾星期前，上網見到突破會係６月１３日賣旗，我拿拿聲就報名做義工幫手

星期六，一朝早等大佬Ｂ起身飲埋奶，就同爸爸一齊出發去紅磡火車站到賣旗

（前一晚已經話左比大佬Ｂ知第二朝會去賣旗，做賣旗哥哥

唔知佢係咪興奮得濟，十點訓落床，到十二點先正式訓著．．．）

我地成十點先去到，負責人比左一疊貼紙同一個錢袋比我地

岩岩開始，大佬Ｂ可能比較怕醜，亦唔識”叫賣”

頭十五分鐘都係得幾個人買旗

期間爸爸就一直係咁話我地唔叫人買旗，仲不斷叫我地大聲Ｄ

我都覺得奇怪，做咩好似咁趕時間咁呢？又冇時間限制，點解不斷催我地叫人買旗呢

到最後我終於知道，原來爸爸以為要賣晒果疊貼紙先可以走

解釋完比爸爸聽之後，佢就冇再催我地，不過就係咁嗌攰

結果我就叫左佢去大堂坐下，淨低我同大佬Ｂ繼續作戰

本來個錢袋我拎住，大佬Ｂ負責貼旗仔貼紙比人

之後大佬Ｂ又想拎錢袋，最後當然比左佢拎啦

唔知係咪Ｄ人覺得佢咁細個拎住個咁大既錢袋好得意

好多人都自動自覺行埋黎買旗

大佬Ｂ見咁多人入錢入佢個袋，個人都大膽左，仲越叫越大聲添～

”唔該幫我買支旗丫、唔該可唔可以幫我買支旗呀？”

大佬Ｂ叫得好可愛唷～～

竟然有人用＄１００買旗！　多謝你比面大佬Ｂ！

我地玩到十一點就將錢袋同淨番既貼紙交番比負責人

呢一個鐘大佬Ｂ玩得好開心，而且仲大膽左好多

希望第時再有多Ｄ機會比佢做下義工啦～