黃金周；出水痘

呢三日假期，天氣非常好，本來係外出既好日子

不過因為大佬B出水痘，除左假期冇得去街之外，黎緊呢個星期都唔番得學

五月一日，假期既第一日，大佬B完全正常，咩徵狀都冇

朝早仲同佢落公園踩單車

點知公園係唔踩得單車既，最後去玩滑梯、千秋

玩到中午先番屋企

到黃昏時間，覺得佢個人有D暗熱，所以同佢睇中醫，諗住清下熱

雖然有D暗熱，但夜晚都仲食到一大碗飯餸&大半碗湯

五月二日，朝早起身，發覺佢面同額頭有兩小粒紅點，好似比蚊/蚤咬咁

又以為佢訓覺果時唔小心"R"損左，不過檢查手指甲又冇咩問題

下午開始有輕微發燒，每次都係燒半個鐘，隔一兩個鐘又燒一陣咁

雖然有燒，但大佬B全日都好精神，中午同夜晚都食得好好

晚飯之後同佢沖涼，發現佢右邊手臂內側有一粒比較大既粒粒

我同媽咪都懷疑係因為呢粒野而令佢發燒

所以就即刻同佢去法國睇醫生，最後醫生都診斷佢係出水痘

一睇完醫生出黎，姑娘即刻帶佢去隔離，我就負責去拎藥同比錢 ($800.......)

離開醫院之後，媽咪話番比我聽，當姑娘帶左佢地入隔離病房

係閂門果一刻，大佬B問 "做咩要困住我地呀？"

仲攬到媽咪實一實唔放手，跟住媽咪講左句好搞笑既安慰說話

"因為你頭先乖，D姑娘又見到我地攰，所以比間有床既房我地休息

同埋可以係到等媽咪番黎囉"

小朋友既天真真係好可愛，佢聽完媽咪咁講，即刻放開懷抱，仲係床到玩添

番到屋企，大佬B好快就訓著覺，我就自己番屋企

媽咪話佢成晚都訓得好好，不過我就起左四次身去廁所.......

五月三日，朝早起身去媽咪到睇柏丞，發覺佢都仲好精神

隻手好似出多左一兩粒咁，而且一路食住藥，都冇咩點發燒

不過過左黃昏之後，大佬B開始燒多左D

面同全身都多左好多粒，而且應該開始痕，成日都摸同想"R"

咁當然比我地禁止佢"R"啦，仲同佢搽醫生開既藥膏

好在佢有懶玩性格，佢想"R"都只係維持左二十分鐘到

之後同佢玩，玩到忘晒型，成晚都冇再"R"過

到夜晚佢訓左覺，我又番屋企，襯大佬B唔係到又順手執下屋

今朝問番媽咪，佢話大佬B零晨四五點醒左唔肯訓床，要媽咪抱住

又有小小扭計，真係聽到都覺得陰功豬呀 ((係兩個都陰功豬))

最後抱到六點，比左藥比大佬B食，飲左D奶又再訓

呢個星期唔番得學，都會由爸爸幫我睇住佢

希望大佬B唔好咁扭計同埋唔使咁辛苦啦~

P.S.

起初聽到醫生講話大佬B出水痘，我都驚驚地

不過係醫院同直到今朝打左去健康院同QE問情況

知道我已經出過水痘同埋下個月就生，對大人同BB都冇影響

真係安心好多~

另外，大佬B既介片計劃要暫停喇.....

等佢好番先再算啦~