一歲啦!! 27-11-2009

唔經唔覺, 原來開blog都已經一年, 在這裡一年裡, 有幸認識到幾位blog友, 大家可以交流下心得, 都算係一個唔錯既得著。

原本開blog既意願, 係可以記錄低我兩夫婦既生活逸事, 等將來年紀大了, 可以好像睇相簿一樣重溫。但近來發現, 唔知係咪人已經開始大, 都唔需要等將來, 有好多事情現在都要依靠個blog去睇返, 睇返件事幾時發生呢? 間店舖有冇幫襯過呢? 幾時....等等, 真係唔認老都唔得啦。

再者, 自重有blog之後, 生活都比以往充實好多, 雖然我地既上稿量唔係太多, 但每日都會放小小時間落個blog到, 可以係寫下新稿, 又或者係研究有乜改進, 再唔係就發掘下新既題材, 而出開去食飯又會諗下, 上唔上blog好呢? 不知不覺, "blog", 已經慢慢地入侵了我地既生活, 而亦因為有了這個記托, 我地既生活都過得特別充實, 唔知大眾blog友有冇同感呢?

意外收穫 - 就係當初開始寫blog時意想不到既得益, 除了一班blog友之外, 最大既得益都莫過於中文既進步, 因為大大話話都已經寫了百幾篇稿, 加起黎都有幾萬字, 有好多字由開始時唔識, 唔記得, 打得慢, 要用手寫板, 到現在可以算係打得出, 唔會太慢, 已經有好大既進步, 咁當然啦, 亦有好大既空間可以改進, 而這些改進, 就要在往後加倍努力啦。

隨著一年過去, "The Show Must Go On", 我地將會繼續努寫好個blog, 希望俾將來既我倆, 有一個美好既回憶, 記下多一點逸事, 帶來多一點回憶, 將會係未來我地個blog既大前題, 大方向, 希望大家對我們有什麼地方做得唔係太好, 可以指點下就最好喇, 多謝多謝。