終於贏了....感覺係....

2001年加入HATO，都好多年了，雖然中途因為生ＢＢ停過兩次，但一直都好似冇離開過，一齊經歷咗好多，估唔到黎到呢日，喺咁ｏ既天氣下，我地終於贏咗冠軍

贏呢場比賽真係好衷心多謝好多人，首先當然係教練啦！咁多年黎佢都放好多心機喺HATO，時時都放我地喺第一位，一直都冇放棄呢個冠軍夢，終於成真喇，感覺如何呀 

另外，仲有一班默默為HATO努力的人，阿米喺忙碌生活都抽時間處理隊務，督促教練＆球員，辛苦你了，全靠你、CATHY、STEPHANIE、KITTY的堅持執著，令HATO成長到今日，成為冠軍隊伍，多謝你地當然仲有阿嘩、小朱、阿敏、ＡＩＲ等等．．．你地緊腳式的出席練波，作為隊長我真係慚愧．．．但大家實在太抵錫了冠軍係大家應得的！！

贏呢場比賽還要多謝好多人，要多謝友隊教練要求照比賽（其實我地教練要求取消的），多謝阿象、UMPIRE決定照比賽，要多謝上天落大雨、喺咁差的天氣我地有著數令友隊投手控球不穩？好天我地就唔會贏？但大家在同樣不利因素下，減低失誤可能成為取勝最大因素，KITTY能喺咁的情況下，投出咁多好球真係令人佩服，教練期間叫過我幾次準備隨時投波，我都真係”拎拎頭”，因為我真係冇信心，從來都冇試過上投手丘投波，喺旁邊練時已經完全企唔穩，幾乎滑腳一字馬，就算要換，阿米一定會比我有經驗，結果教練明智決擇，最關鍵時刻換阿米，無論佢熱身時幾唔順，都比賽時佢就會發揮佢的小宇宙

當然亦有賴野手幫忙，AIR作為捕手真係超勁，喺泥漿裏面同棒球玩遊戲，縱使球球地波都彈到佢成面、成眼都係泥，佢都死命盯緊個波，BLOCK晒所有波，真係功不可沒 另外，CATHY都有好靚的打擊＆最後一球決勝高飛球及最後一擊，你一直以來的努力冇白費了，好戥你開心

另外，仲有一Ｄ呢場較少波到（冇機會表演），較少出場的隊友，但其實你地今年內之前咁多場比賽大家所付出的努力都係好重要的，加上你地喺場邊的支持真係令我好感動，抹波、抹面、眼藥水、掃地、打氣聲（落住雨遠道而來打氣的舊隊友），好俾我感覺到，大家唔係只係為咗想贏波，大家真係放個心喺HATO，互相支持，一條心咁去打好比賽，坦白講比賽前真係冇乜諗過會贏，唔係覺得贏唔到，而係覺得要贏呢場波真係要好努力、好難．．．結果大家的努力，令我好感動！！多謝你地令我再次感到熱血棒球、熱血泥漿棒球！！

亦都要多謝友隊的所有隊員、教練，大家都好努力，演出一場咁精彩刺激的比賽，真係贏得有Ｄ險希望日後再比賽對決時，都可以開開心心再拼一場精彩的比賽，希望到時可令你地感到成長中的HATO的威力

另外，都要多謝UMPIRE，今場的UMPIRE好辛苦，都攪到一身泥．．．希望下次棒總會安排場務，唔洗我地隊友們咁忙碌就更好啦

噚晚一齊食飯時，我話呢場波冇乜感覺，其實到真係贏咗，當然係好開心，但黎到聯賽後段，大家越打越好，之前贏小鳳仙嗰場反而仲激動，覺得大家終於一齊有嗰份贏波的信念．．．相反到咗決賽，平常心咁去打，盡量唔好失誤，贏輸對我黎講都唔係好重要，睇到HATO的成長，已經係最好的奬品，大家俾到我的支持，就係我打咁多年棒球想得到o既．．．所以真係好滿足了

不過到咗最後一攻，我都好替batting box裏面的隊友緊張，又差ｄ俾壘上面(差d俾人煎把佢)的runner嚇死．．．當時真係好緊張，好在之前防守時我冇諗比數咋，如果唔係嗰幾球差ｄＯＵＴ到的波，我實緊張到接唔到呀

繼續加油呀隊友們！令HATO成為更強的球隊呀！努力係唔會白費架！