電視剛剛播完《霎時感動》，呢個節目，其實好代表到TVB，正正可以話係無線精神——無視知識產權。
大家有無諗過，每一集嘅《霎時感動》，內裡故事響邊度嚟？有幾多係無線原創？幾多係嘉賓個人故事，幾多係網上一直流傳，轉寄又轉寄嘅故事？
只不過每集搵一個藝人或嘉賓講一個小故事，但請留意，呢啲故事大部份係「外借」，但經無線拍成影像，就好似變成佢地原創節目，有無諗過其實係偷稿？又或係侵犯版權？
呢個節目，令我諗起萬里機構出版嘅一系列小開本叢書，都係結集別人著作出版。最離譜係，只要翻開版權頁睇睇，就會出現一段大意為：「如果你係其中一個作者，請興我們聯絡，我們會俾番稿費你。」乜話？如果我係作者，一定賣俾你？我話我做故仔值一百萬，你係咪照俾先？偷咗嘢，事後「咁好彩」被人捉到，再由賊仔決定俾幾多錢物主，乜嘢世界？最好笑本書仲要印住：「版權所有不准翻印」！你有乜嘢版權可言？
《霎時感動》其實有乜分別？偷橋一向係無線強項，兩台搞歌唱比賽，ATV買正版權，無線呢？早前官方刊物仲推出《霎時感動》結集本，賣到嘅錢，真係唔知應該分翻俾邊個。
香港人，乜版權呢個課題真係大到咁令你地少少認知都無？
《霎時感動》嘛，我估大台一聲徵稿，大把人交稿啦，家下好多傳媒都識得利用好多創作人「想出名」心態，話明你投稿我攞嚟用，但一蚊稿費都唔會分俾你，因為我俾咗個機會你，你已經賺咗㗎喇。
點解無線唔可以做得好啲？正正經經用一啲原創小故事去感動香港人，為香港人打氣呢？老豆偷返屋企，個仔仲要借屍還魂......唉。
