我鍾意睇小克作品，鍾意佢嘅作品畫功了得多變，可以搞笑，又可以正經，可以感性，都可以發神經。
睇今期TOUCH，一大篇文章，OK啦，間中睇下佢寫嘢都幾好，寫得又畫得，香港唔係太多人可以做到。
可惜，睇到兩個我覺得幾礙眼嘅字——「死線」。
我覺得自己真係太長氣，見一次講一次，但又忍唔住口。不如大家都幫幫手，幫手宣揚開去啦。我地中國文字有個字詞用咗N咁多年，一直都存在，佢叫做——「限期」！
「Deadline」係解作「限期」，可唔可以用番呢個字呢？各位文化人？唔該晒。
手多多，去Yahoo字典試下打「Deadline」，好在，佢都係用「限期」。再睇落去，真係出現「死線」，係解作：「（監獄周圍的）死線」。
早前同朋友食飯，講開好多年前，有齣戲嘅老翻，內地翻譯差勁，經典之作係：「All Right」，竟然解作「全左」！
唔好笑住呀，當「Deadline」大家都習以為常叫做「死線」，我真係相信有一日，我地都變晒「全右」！
