36w5d (仲有 7 日就同囡囡見面啦 ~) (續)

之後我地顧住通知屋企人同搞囡囡 D 野，我都無再詳細諗....... 到夜晚瞓瞓吓覺，我突然成個人「窄」醒，好清醒咁同老公講，我覺得係醫生睇錯日期，無理由未足37weeks就要開刀，而且佢仲叫我地約下星期返黎覆診，好明顯係睇錯月曆啦 ~ 老公俾我嚇到成個人醒晒，但個時係零晨四點幾，我地咩都做唔到，就算打電話去問，都要等到聽朝人地開工啦 ~ 但我真係瞓唔到，好內疚自己點解個刻剩係識得驚，唔諗清楚，唔問清楚醫生呢?! 如果囡囡未足月就出世咁點算呀 ?

到第日我同老公各自不停打電話去QE，不過可能係 01 Oct 公眾假期，一直都無人聽電話..... 無可奈何之下，唯有等 02 Oct 再打去問啦 ~

到 02 Oct 返到公司，係我朝早開完個會出黎，我收到兩個 miss call，原來都係 QE 打黎既，叫我盡快 call back，我聽完個留言之後，更覺得我之前個估計應該無錯 !! 我打番返去，個姑娘就同我講，醫生幫我個手術改咗期，改咗去 12 Oct，因為我到時先滿 37 weeks 喎 !! 嘩 ~ 好彩個護士真係有跟進我個case幫我問醫生，如果唔係囡囡咪真係未足月就出世 ! 感謝主 !! 跟住佢仲幫我約埋 05 Oct 去見麻醉師。

05 Oct，我同老公請咗晏晝假去見麻醉師 (Yeah ! 早咗半日開始放假)，去到就先抽血，填問卷，量血壓同磅重(唔知點解我又輕咗兩磅?)，之後見麻醉師講番個麻醉程序同風險，跟住就走得啦 !!

Yeah ! 仲有一個星期唔使就見到囡囡啦 ~ 我地全家人既生日日期都係二字既倍數呀 ! 老公係二月廿四，我係十二月廿四，Bubble 係二月二十，囡囡係十月十二 !!

**********************************************************

p.s. 好多謝一班好愛錫我既同事同好朋友，佢地唔單止成日問候、鼓勵、照顧我，臨生前同事們仲分別請我食飯，預祝我生產順利，又同我講生咗之後一定要通知佢地，佢地會黎探我同BB，有個同事仲好到煲埋腐竹蛋糖水俾我食，你話有一班咁好既同事同朋友夫復何求呢 ? 所以我一定會加油生個肥肥白白既囡囡出黎既 ~