黑...爆爆爆Sunday

呢幾日都係一號波...之但係打唔成風就要落足3日雨, 相信今日(Sunday)係落得最甘嘅一日, 落雨落到倒屎咁未停過!!! 我仲要由朝"黑"到晚囉, 呢10年都未發生 or 從未發生過嘅, 今日我都受哂, 亦都多謝哂

~~~~~~~~~~~~~~~~~~~~~~~

1. 一朝早返工已經趕出門口搭村巴, 仲要唔小心踢咗張報紙出門口, 整嚟整去都踢唔返入屋, 阻哂我d時間. 忍唔住講咗句"掉拿星" !!

2. 明知我趕時間, 屋企部lift 都未壞過, (即係唔會冇啦啦停, 唔上唔落果d)....不過今次搭去到中間就係咁樣囉...我"車困"lift, 冇啦啦好快又好大力咁"chok"幾 "chok" & 停幾停, 真係玩嘢!! 當時我唔識驚, 只係好嬲...點解咁Q玩嘢?!?!?!!? 即刻按鐘call樓下"食蕉"睇吓做乜...過咗一陣又正常落樓!! 我趕到都冇時間同"食蕉"講咩事, 只係話個lift停咗, 之後一支箭咁標出去 !

3. 落到去村巴走咗唔等我, 出面又倒屎咁大雨....但都要照行10mins去地鐵站, 成條褲濕哂!

4. 行緊果陣大風大雨 (打風都冇咁大雨), 吹到d頭髮 "cake"住把傘, "cake"甩埋隻髮夾唔知去咗邊?! (好彩今日心血來潮用Cheap狗髮夾, *即係$5/包有好多隻黑色果d*, 否則肉痛心痛!)

5. Lunch見有Break去買飯, 點知唔記得去櫃員機"禁錢", 就係差果$5就要我來回一條好長嘅街兩次, 只係為咗果$5!! 出面又落緊雨, 又趕...行到我PK咁滯!

6. 放工啦諗住去搭車, 但又落緊雨咁我開傘啦....點知我一開, 把傘條"骨"斷咗, 佢老尾呀!! 好彩車站算係近...... 冇眼睇.....塞把傘去餵垃圾桶!!

7. 好啦, 返屋企打呢篇Blog諗住呻吓啦....打好就俾"表妹K"過目先, 諗住俾佢睇吓我有冇打錯字, 點知俾佢話我呢篇係"史上最多錯字既一篇blog"!! 不過而家已經改返哂, 你地冇機會睇到我打咩爆笑嘅錯字 ~

~~~~~~~~~~~~~~~~~~~~

以上7點全屬事實, 多謝收看!