不愉快事件(好激氣呀！)

Saturday嗰日冇乜地方去～原本想去"彤彤"學校＾嘉年華會＾有攤位遊戲玩同各樣等．．但因為老公收工返嚟好攰；一瞓就瞓到好晏所以取消冇去．．佢起身之後就話不如去探吓亞媽(我奶奶)；因為太耐冇去(都有三個幾月)於是好勉強咁應承佢上去坐一陣就話要走喇！

返到大埔於是約埋細妹佢哋一齊上醫院探我嫲嫲(因幾日前喺屋企又跌倒；今次比較手尾長始終係個老人家～過兩日重要做手術添；希望佢冇事啦！)

之後返到大元邨就發生咗啲好勞氣嘅事～事緣老公同我細佬亞妹夫三個人喺樓下停低架車等我同細妹接番我哋嗰兩個＾反斗星＾準備去食飯．．我哋一落到去就見到多咗個男人圍埋一齊唔知傾乜？

行到過去至知佢哋喺度嘈～我只係大約知道個癲佬＾無啦啦＾屈我細佬又話要報警又話我老公以前打過佢幾次所以佢要打我老公～原來我哋未落樓之前我老公原本坐喺架車入面；而我細佬同妹夫傾緊偈突然間個傻佬行埋去問我妹夫識唔識車入面嗰個人～之後個傻佬行埋去問我老公可唔可以出嚟傾兩句於是一出到去無情情比個傻佬踢中咗隻手腕(好彩係皮外傷)而且我老公根本唔識佢．．我知道咗之後當然好嬲於是同佢嘈起上嚟！對方猛咁講粗口重陏手陏腳想打我添．．當時我細妹同妹夫佢哋喺度阻止所以打唔到我～

擾攘咗一輪之後警察終於嚟到而我就企埋一邊等個警察了解成件事情～而個癲佬重繼續喺度發癲．．經過大半個鐘頭之後其實個警察都知道係個癲佬唔啱在先原來佢啪咗丸仔wing wing哋可能認錯人又或者睇我老公唔順眼等．．(冇人知乜嘢原因囉！)

其實應該係我哋報警告佢傷害他人身體至啱～反而係佢惡人先告狀喎！最後警察問我老公追唔追究；我哋因為唔想攪大件事始終對方有＾黑底＾又係街方街里而且都有少少親戚關係所以決定唔追究～初時個癲佬依然唔肯走繼續喺度發癲最後要佢大佬落嚟至勸得掂佢走咋！

嗰一刻我重依然好嬲覺得好無辜；如果剎人唔駛坐監我真係會剎咗佢．．攪到我依家都唔敢叫老公停喺大元邨樓下等；因為我真係唔知個癲佬幾時又出現到時唔知又會做啲乜！希望佢快啲比人斬死啦！

總之真係好無奈；唯有嘆一句＾倒楣＾！