ICH

腦外科病房

晚上九時, 下午班的同事正忙於交更給夜班同事.

電話響起 ...

"叉住!" "唔係嘛?!" 幾個姑娘同一時間說.

"喂, admission 呀, 收個紅旗, 女人, 50歲, tube 住上, 一條龍呀, 唔該!"

(如果你不是於急症醫院工作的朋友, 讓我解釋一下:

admission = admission office 收症室同事的自稱,

紅旗 = red flag case = urgent case 立即會上病房, 或已在病房門口!

tube 住上 = intubated 因病人不能自行呼吸, 已插入喉管, 用機器幫助呼吸,

一條龍 = 於幾大急症室, 當病人被診斷為急性中風, 為把握治療的黃金時間, 病人會立即被安排腦部電腦掃描, 然後直接上病房, 可能五分鐘已到病房.)

一個電話, 平靜的病房立即忙起來.

安排一張近護士站的病床, 為其他病人轉床,

借呼吸機, 準備急救車, 觀察儀器,

call houseman standby,

還要盡快完成手上慣常的工作 (routine).

15分鐘, 30分鐘, 45分鐘過去,

夜班姑娘開始不安, 病人是否病情有變?

R房 (急症室裡面的急救房)電話接通,

"一條龍出門口未?"

"未得呀, tube 唔到呀!"

夜更姑娘心冷了一冷.

病人終於到病房, 只有急症室姑娘同 M.O. escort, 無家人陪同.

急症室同事先交更:

" Female, 50歲, 係麥記 collapse, GCS 4 分, 只有張身份証影印本, 無 history, 無入院記錄, 搵唔到屋企人, 乜都unknown, 估計有200磅, 頭先好難先tube 到, CT 做埋, 瀉晒, 依家 BP/P stable, 100% FiO2. 交俾你地喇!"

(給非醫院的朋友:

collapse = 突然失去知覺, 原因可以很多,

GCS = 昏迷指數, 最高 15分 (清醒) 越低分越不妙, 最低 3分)

M.O. 睇完CT片, 搖搖頭,

"瀉到入 ventricle, 無得搞播, 唉! 搵屋企人先啦!"

安頓好病人, 所有儀器都正常運作之後,

夜班姑娘便開始搜尋病人的手袋 ...

幾經辛苦找到一張陳舊的紙張, 上面有一個人名及一個電話號碼,

夜更姑娘立即硬著頭皮打去試試.

"喂, xx醫院姑娘, 請問呢度有無人識得 XXX?"

"呀 ... 佢係我家姐, 不過好多年無聯絡喇, 你搵佢老公啦!"

"咁佢老公幾號電話呀?"

"唔知呀, 都無聯絡 ... 佢乜事呀?"

"佢暈o左入o左醫院, 而家好危險播, 你都係o黎睇下佢好播."

"咁我依家o黎啦 ..."

一小時後, 幾位很久不見的兄弟姊妹終於到達病房,

on call M.O. 把病情解釋完,

家人只是沈了一下,

"咁多年無見, 估唔到再見到係咁 ..."

"都唔知佢生活係點 ..."

"都唔知佢有無心願未了 ..."

沒有人會知道下一分鐘所發生的事,

沒有人會知道自己會否一睡不起.

所以請大家今天的事今天做,

多關心身邊人.

如果你是獨居,

請你間中向家人及關心你的人報個平安,

他們真的掛念你.

如果你還有說話要跟你的身邊人說,

請立即行動,

不要給自己有遺憾!

珍惜眼前人,

沒人知道下一個 collapse 會是誰.