慢慢嚟，唔駛急...

每朝，我都會起身擦牙後就俾早餐三寶食。

今朝鬧鐘未響，我就已經醒咗，個心忐忑不安咁...

出到廳，佢地三個都好熱烈咁歡迎我。我如常地俾糧肥野，跟住俾小豬黑黑同棉花糖每兔一粒糧。

佢兩個當然係好快就食完一粒糧啦！當我準備俾草佢地時，我見到肥野停哂口，我以為佢食哂d糧，點知...

我見佢四圍走，跟住就不時發出d"咯咯"聲，好似d老人家有痰咁...

我好驚呀！即刻叫醒二號，佢亦都用從未咁快嘅時間擘大佢對眼，走出去睇肥野。

我地見到肥野好似好驚咁，走埋一角唔郁，淨係有d"咯咯"聲...當時係6點幾，都唔知點算好，我唯有狠心打俾棉花糖契媽嘈醒佢，問下佢點算！

好彩佢唔太爛瞓，打咗兩次就聽咗電話，佢教我將肥野倒轉，即係少少好似倒立咁，跟住掃佢肋骨(後來佢清醒嗰陣，話應該係輕輕力拍下肋骨)。我掃咗一陣，肥野真係冇咗d"咯咯"聲...

抱咗一陣見佢定番，冇事，就放番佢番屋企，二號餵草俾佢佢都肯食。

嚇死我地！

後來我同Mrs. Fish傾過，佢話年長兔係會有鯁親情況出現。建議：

1. 唔好第一餐就俾糧。因為第一餐好肚餓，會食得好急，俾菜或草會好d。

2. 唔好將糧放糧兜。將糧放糧兜會令兔地容易一次過食幾粒，容易鯁親，要將糧分散放地面，等兔地逐粒逐粒食，減少鯁親機會。

經過今次，又學多d嘢，仲嚇到短咗幾年命！

另外發現咗樣嘢，就係事發時小豬黑黑四圍跳，好八卦咁走埋去肥野度企高望下，又偷食肥野d草，唔知佢係趁熱鬧定係想引人注意到肥野有事呢？不過佢又見唔到肥野架喎...

有兔媽就問我：咁棉花糖做緊乜？

因為棉花糖同另外兩兔食嘅草唔同，平日我係最後先俾草棉花糖架，所以事發時其實我係未俾早餐佢食！我地睇緊肥野嗰陣，佢就跳上跳落咁話俾我知佢好肚餓！真係唔好意思呢！