花班百態、隨時更新

花班百態、隨時更新

日本上花班親眼目睹阿太學生只因拉櫈時發出刺耳一聲、慘被老師當衆叱責。而我嘅插花班、同學們高談濶論、暢所欲言、好似係十八樓C座進行。我想請係日本啲老師嚟我度、感受一下嘉年華嘅氣氛、佢地一定嘆為觀止。

本以為插花係一種優雅的興趣、點解學生要我改花時、好似街市買菜爭俾錢一樣、行為和一般師奶無異。會唔會唔論住南灣別墅獨立屋又或者深水埗籠屋板間房嘅師奶、其實本性可能都係一樣。

為乜嘢要在堂上跟我爭論得面紅耳熱、難道你會插得比我好？幾堂未學識就發難、又話西花點、其他日花點、識嘢咁多唔好嚟學出嚟教。從無聽到日本學生會係老師改花時講「嗰度吉咗啲、下面無咗啲嘢、加多枝會唔會好啲。」講得咁叻、唔使攞出嚟改。

「阿Sir、你用肺講嘢？」我靠把口揾食嘅、講鬥嘴我肯定唔會輸俾你。你係廿幾人面前講啲咁嘅嘢攞晒彩。希望有日你個仔會同你講「阿媽、你用肺講嘢？」。人前人後兩個樣、口賤我都敢認第一。

無交花材費、見花坐低就開工、何以會咁厚顏。改花唔見咗把剪、先知有人聲都唔聲攞去用、俾人發現仲笑騎騎、「唔好意思對唔住」都唔曉講。教花改花之餘、仲要一眼關七、唔係就一定會損失。

有無聽過「同學仔、你插完就好走啦、唔好掃地啦。你掃咗、阿Sir做乜？」「我插咁靚、你唔使做嘢呀！」好似時光倒流、回到文化大革命、老師被批鬥。

「啲花殘過你。」「我最憎菊花！」「可唔可以換過枝？」「已經係度甩。」埋怨之聲此起彼落。你地撫心自問、真係差到咁？出面花班乜嘢價錢、大家心裏有數。大家咁識揀嘢、相信老公一定係再世潘安、唔高大靚仔唔要。

一路插花一路「shit」一路「fuck」、水盤裏面無花只有兩枝毛筆、千奇百怪、光怪陸離。爽手插兩盤、我話唔好意思、改花要等第二輪、一對白眼飛埋嚟、掃低晒啲花、下堂唔再返。學費平就會招惹到三教九流嘅學生、唔知學花嚟做乜？

唔使對號入座、無做過嘅可以當笑話睇、有做過嘅亦唔需反省、我無資格教你做人。

教花唔係我正職、要揾錢唔使靠佢。點解人會咁無品、我為乜要受氣、唔教係遲早事。雖然話唔係所有人係咁、但只要一隻牙痛、就會全身唔舒服。如果全身痛、就直頭死都得。

事到如今、上載花相更是無謂。從此講吓花班百態、嬉笑怒駡、隨我喜歡。