一擲三千鐵定去馬

終於鐵定跟大肚婆黃師奶個教練學潛水，
隔2日就去上第一堂，12點至5點上理論堂，之後6點到9點去泳池學潛水，
心情又緊張又興奮，希望花了3千大元去學潛水後，磨練到自己，最重要一切順順利利，
大吉利是講低先，有乜事唔該幫我捐哂啲器官去幫人，之後就黎個火葬。安心哂！





其實學潛水的念頭源自於今個月上網睇去馬爾代夫的資料開始，
水底世界有多美麗壯觀? 現在還未知? 但要我在水底暢遊老實講真係有啲恐懼同擔心，
古語有云：欺山莫欺水！一向同海洋未去到融為一體境界，
加上水性唔算太熟，學潛水簡直比學考車牌更驚更震。

今次十五十六咁去學潛水，主要除了欣賞水底境色外，最重要是給自己一個考驗，
學每一樣事的過程都係由好奇、恐懼、擔心、學習、適應、熟悉、實踐到喜愛，
現在我經過好奇、恐懼、擔心三個過程，下個 step 就要 "學習"。

近個星期因為要落實是否在6月23號上第一堂而掙扎，
不斷上網睇其他人學習潛水的過程同分享，睇完就十五十六唔學唔舒服！

其實一直擔心自已能否應付水底技術外，
對身處深海個種無安全感的心理狀況，絕對係要經學習潛水去克服。

可能始於未去試過，個腦就不斷有疑問，亦會反覆考慮自己可以做到嗎?
想深一層，現在只缺點勇氣，咬實牙根好好去挑戰水底世界。

雖然單人匹馬去學，我諗我應該唔會有事卦，咁最後我要宣佈

我去學潛水啦喂！