夜走麥徑 (上)

上個星期六進行左毅行訓練最重要既一課, 夜行麥徑三四五六

因為預計比賽當日都係差唔多時間行依段, 所以依個係一個好重要既練習

一黎要俾大家預習下行通宵山扺抗睡魔, 又要試下摸黑上落級同認路, 亦可以試埋第五段因山泥傾瀉而改道果段新路, 一舉幾得

七點在鑽石山食完燒味飯後就坐車入西頁, 訓足全程養足精神..

西頁入北潭坳又要坐半個鐘, 又訓多半個鐘..

隊友們見我每次搭車都一睡不起, 紛紛擔心我會頂唔順行通頂..

係呀...尤記得以前第一次玩時.. 體力唔係問題.. 最大既敵人係睡魔...

果時練習時己經好搞笑, 有一次練通宵行八九十, 行到第九段時因為全程馬路咁濟嘛, 大家都開始feel到悶同眼訓了, 結果有幾次就咁坐在路邊石膊度訓幾個字, 去到燒烤場一人霸一張木椅又訓幾個字, 哈哈哈, 真係諗番都覺得果時好搞笑架

咁今次又點呢... 已經唔及上次年輕了... 要挨眼訓就更難... 唔埋啦, 最多到時靠意志力啦, 頂硬上都要架啦...

講番練習, 去到北潭坳時先發覺原來都幾多人練喎今晚

有d由第二段行過黎, 有d同我地同車一齊出發, 有d練夜山, 亦有唔少係果d民安隊或童軍之類係諗住去嶂上camping既

一開始上山, 我帶頭, 最唔鐘意跟住人地d長龍行架喇, 佢地速度又唔高, 人又多要過又麻煩, 又唔讓人喎... 所以一有機會我就會過佢地的了, 無人可以超越係我前面!!

可能因為咁, 依段上山都幾快.. 話晒都背住成4L水喎, 去到嶂上時都只係45mins,

不過因為小弟成日望住地下係咁衝, 都唔睇路既.. 經過一兩次行錯路(得我行錯咋喎, 佢地都好醒咁行去o岩果邊既分叉路, 仲要等我行多兩步先叫返我轉頭喎..) 結果都係改番由經驗老到既Andy帶路好d

11點左右落到水浪窩, 成績唔錯, 只係用左兩個鐘多少少, 隊長話俾佢地以前日頭行時都無咁快喎, 都係既, 夜晚無個大太陽係度晒住又無咁熱嘛, 差幾多架~

不過跟住隊長話, 頭先上嶂上石雞公山果兩段... 俾我同Andy谷到佢快要爆了, 下段由佢lead喎...