月巴氏的知識分子小講座

由於過去一年（或更多時間）都一味睇推理小說，終於頂自己唔順，索性把已經睇咗一半（都未係好入正題）的《姑獲鳥之夏》放低，並下定決心，拎番起一些買咗超耐但擺埋一邊都好耐的非小說書籍。
首先獲得我寵幸的，是一本有插圖的簡易版《維根斯坦》，話就話簡易，其實唔多簡易，書是看完了，但我唔敢話自己明晒——最大鑊是睇完先發現，原來這本書，我早幾年前就睇過，不明白的地方，還是不明白，證明我呢幾年毫無進步。
唔識死的關係，第二本看的，竟然是半張插圖都冇的維根斯坦晚年巨著《哲學研究》；我睇咗五十幾頁，唔掂嘞，完全唔明，再迫自己睇落去，都係玩自己。
第三本看的，是四年前才仙遊、艾德華．薩依德的《知識分子論》，竟然又俾我睇得晒仲明明哋添喎。可能我曾幾何時都自覺係知識分子吧。
作為一個知識分子，是有其責任的。大學時，勁鍾意新儒家，拜讀過徐復觀的《中國人性論史》，在引言部分就說到知識分子的責任，是要有「憂患意識」（在理想層面而言，薩依德的見解，跟徐復觀的大同小異）。
當年我讀到呢一句，嗰種震撼，直情好似「標童」一樣，成個人由內到外，都好似俾一個新生命進佔咁款。
大學那三年，我主要搞思想史（齋搞史太過實在，齋搞思想又太過唔實在，兩樣加埋，易搞啲），錢穆高徒余英時的著作，看得最多，講真，余生寫的思想史論文，的確幾好睇兼幾有娛樂性。
某一年，歷史系為紀念錢穆，搞了一個講座，找來許倬雲（他的《西周史》也是猛料來的）和余英時主講，基於兩位都是國語人，而我當年的國語水準，是幾乎等同一個聾人，成個talk，我都聽唔明——聽唔明，自然有時間心力去留意其他事——我留意到，當輪到許倬雲發言時，可能余生有心事或忽然間掛念恩師吧，竟然大部分時間在把玩枱上那隻玻璃杯和筆，在我這個尋常學生看來，簡直跟一個後生仔或細路仔時發吽豆時的情況無異——另，當晚大會還請來錢穆四位公子來做嘉賓，聽聽兩位當代史學名家如何講其老豆的思想，但四位公子可能舟居勞頓吧（他們專誠由內地來的），竟然各以不同（難看的）睡姿瞓著，實行同老豆進行只有他們才明白的心靈交流……
這個畫面，自此就一直嚴重地打擊我對「知識分子」四隻字所抱持的信念。

今時今日，都好似有好X多知識分子，又好似好X有口才咁款，既會帶你去暢遊名城，又會同你講The Beatles《Hey Jude》一曲的創作緣起（只不過講錯晒），最把炮的，還是會煞有介事發表好多懶有微言大義的道理……

知識分子，基本條件自然是讀過好多書好有知識，但純粹讀過好多書好有知識，不代表閣下就一定是知識分子。

而我這個冇乜知識分子，正在拜讀薩依德起朵巨著《東方主義》，好鬼厚，但搭車時睇，每每搞到隻手好攰，所以有時都會轉睇吓game書。勝在冇包袱咁囉。