夾死你

白痴 IQ 題，多啦A夢個仔係邊個？哈哈，係『冬甩』呀！

 (歌仔都有得你唱：donut 個爸爸，donut 個媽媽，多 — 啦 — A — 夢)

食住呢條線，再來一道：咁你知唔知多啦A夢個仔係點死嘅呢？

哈哈，係俾電梯夾死架！

(呢果個唔知係乜牌子嘅香口膠，好似有隻叫做『曬駱駝』嘅物體喺電梯度不停咁對住啲冬甩咁話『夾死你』)

廢話一輪，入正題。

今早在九龍站搭港鐵返工，時為早上差兩三分鐘就到9點，整排列車擠滿了上班族，車門打開，有三個人下車，也有三個人要上車，按物理學原理粗計，應該有足夠空間容納新的搭客。可是情況並非如是，門口仍是密不透風，插針不入。師太一邊講『唔該幫吓忙，唔該行入啲』，一邊以楚楚可憐的眼神搭夠，好不容易才轉了入車廂，緊貼門邊，屏息等待車門關上。嘟—嘟—嘟—嘭，閂門。不過我實在站得太貼了，手袋 (其實是個大大的雜物袋)被車門夾個正著。滿以為車長會再一次打開車門，把手袋『釋』放，怎知列車竟然就此開出。

由九龍到香港只一個站，車程不消五分鐘。車實在逼，我也無法使勁『mung』個袋，只好不住祈禱到總站時千萬要開這邊的門。根據過去兩星期的記錄幾乎超過七成機會是中的，不過或然率都有話：如果要抛銀揀公、字，無論之前開了幾次『公』，下次再開公或開字的機會都是各有一半，即是不可從前次或以前的結果來準確預測下一次的情況。未幾便聽到車長話：左邊嘅車門即將打開… 果然，師太連這最後的機會都落空了！

車一埋站，乘客魚貫離開，我也不顧得甚麼儀態，紥穩馬步，使勁的左抽右拉，最終把手袋『扯』出來，狼狽地離開車廂。還好，這個cheap cheap 平價貨福大命大，竟然沒甚麼損傷！

倒是師太得考慮以後應否坐地鐵返工，至少不應趁要準時返工的人潮，搭九點前的車啊！