變戲法

炎炎夏日，對假日煮婦來說甚是為難。天氣熱得人遲鈍，怎說也不願意買餸煮飯，但一星期只 一兩 天可以閒下來『露』兩手，家中老少總是熱切期待。

就像今天 34℃ 的高溫，街外陽光熾烈，滴風不透，已出外吃過早、午餐，3點多鐘一直掙扎到底在家煮晚飯不。打開雪櫃，昨夜招呼朋友時剩了一大碗冷飯，於是拖到5點半，老伴建議由我發辦買餸，他煮。於是跑到相熟的檔口買了冬瓜、草菰、鮮蓮子、瘦肉、蝦和叉燒，不消半粒鐘便極速完成任務。

老伴只需弄個冬瓜粒湯，再加一個叉燒炒飯便成，兩個人夾手夾腳預計7點前便可開餐。怎知怱然電話到，老大問可唔可以同女友返屋企食飯？老大自從上月中從宿舍搬回家，一個月來一齊食飯的數目真是一隻手都數唔晒，老爸老媽焉有不歡迎之理。不過問題又來了，突然多了兩個『大胃王』，肯定要從新張羅餸菜。老爸到樓下超市買雞中翼，老媽又快快手浸個棷菜，要劏埋準備過兩日至食的牛油果，仲要再煲兩杯米白飯。

結果兩老在廚房洗洗切切，一個用心弄湯，一個專注炒飯，七點半枱上便擺了四餸一湯：

冬瓜粒肉粒鮮蝦草菰蓮子湯 (用蝦殼煎湯底，湯清甜、料豐富，是夏日極品)

青三文魚 (即係牛油果切片，點 wasabi 溝魚生豉油，口感與味道極似三文魚剌身，各人的至愛)

看著一家人吃得開懷，縱然要臨時變戲法，又做得身水身汗，仍是笑口噬噬，老爸老媽都是無可藥救的『笨』老人！