今日似返個老豆

平日都係知悅婆婆湊知悅, 今日知悅婆婆跟左知悅公公出海攞魚, 知悅就要跟住另一位姨婆先, 點知去到下午4點鐘, 電話響起, 話知悅唔掣, 係咁哭, 話要搵婆婆喎. 咁點算好呢, 最後知悅既表姐就抱左知悅落黎舖頭.  黎到知悅已經訓左覺. 咁我一手抱左亞女, 諗住抱住佢訓就算啦. 抱左一陣發覺真係唔掂. 咪隨手咁掉佢落地LAW. 當然唔係啦, 我用左三箱一樣既貨做左張床俾佢, 然後用一包紫菜黎俾佢做枕頭.

知悅都唔知幾咁好訓, 訓左個幾鐘, 郁都無郁過呀. 梗係啦, 果三箱係綿花糖黎架, 我估亞女一定係發左個好甜既夢喇.  我諗今時今日都仲會有小朋友係舖頭訓覺架喇. 你估幾十年前咩.

到亞女起左身, 同我玩左好耐呀. 一直到7點半佢先想走出去冒險樂園. 咁我就同佢去行左一陣, ((係行, 因為知悅唔洗入錢玩架, 行下佢就好開心))之後就去左食牛肉飯.  食飯飯果時佢又好合作呀, 自己食. 之後就細姨婆帶左佢一陣, 我返去開舖. 到9點9, 知悅佢LINE 左屎, ((真係醒, 爸爸帶妳果陣妳無LINE!!!)) 咁細姨婆同佢攪乾淨就交番個女俾我.  我同亞女上左樓, 佢自己話 "我除褲呀,沖涼涼呀" (我估佢頭先LINE左屎,個PATPART 唔舒服) 咁我同佢沖埋涼, 著埋片, 媽媽就剛剛返到黎.

到上左床仔, 亞女又手多多咁攞左我同知悅媽張相出黎話, "呢個爸爸,呢個媽媽", 咁我就指住我自己問亞女, 呢個邊個黎? 佢就答 "爸爸". 咁我教佢可以答 "呢個係你". 跟住我又問囡囡, "呢個係邊個既爸爸?"  囡囡就答 "呢個係我爸爸".  我再問  "咁呢個呢?".  囡囡答 "呢個我媽媽".   佢第一次咁樣講, 開心到我同知悅媽媽呢都真係眼紅紅呀~

今日同亞女相處既時間多左, 我覺得我地既感情好左好多, 亞女妳今日滿分呀!!