去買本【新假期】啦！

今期嘅新假期係介紹「九州自駕遊」、嚟緊張會計画去九州嘅朋友、去買番本啦、然後、放過我吧！

近来越嚟越多人走嚟我個Blog度問東問西、因為「港龍効應」為九州、特別係福岡帯嚟唔少経済効益、但對我個Blog増加咗好多無謂過客。

首先、呢度唔係旅行社・旅遊雑誌・旅遊資料館・日本天気報告、或者「翻譯機」。我開呢個Blog係為咗比喺香港我一D唔識日文嘅家人・朋友、等佢哋知道我喺日本嘅生活係點、因為原本我一直写開日文Blog、但比家人同朋友投訴唔識睇。我有時介紹一D観光名勝或者温泉旅館、唔係想推薦大家去、而係比大家做参考。原本我都唔介意有人問我関於福岡・九州嘅問題、答倒我都會答嘅、但我覺得有D人問嘢嘅態度差、或者問D問題係基本上自己都可以簡単搵倒資料嘅。我可以話比大家知、我唔係一個鐘意幫人嘅人、徐咗對自己朋友・家人。對唔識嘅人我可以講話係一個幾無人情味嘅人、或者有時你哋會睇倒我嘅回應會有D「串」。而家網上資迅発達、多數嘅資料都係網上搵倒、搵都唔去搵就１句弾埋嚟嗰D、我通常唔會理。想自由行、又唔想自己搵資料、最好嘜都有人幫你Check埋、無咁理想嘅。

為咗減少一D無謂嘅問題、電視都教人要Say No!、問嘢前睇清楚先：

①唔好問我攞電話No.或E-mail Address！三唔識七嘅唔會比。

②唔好約我見面！曾経有位人士第一次留言就話嚟福岡之後搵我食飯、唔好意思、我心地唔好、會覺得你只係想搵個免費導遊。

③唔好問我天気如何！世界天気報告喺網上随時搵倒、我覺得唔凍唔代表你都覺得唔凍、而且我習慣咗呢度嘅気温會同你哋喺香港嚟有分別。

④唔好問我點去！我有専用司機、去邊度都係用車、如果你係【自駕遊】、導航用地址就搵倒。如果有D地方HP有介紹點去我都會写出嚟、無写嘅就我都唔識去。

⑤唔好叫我翻譯！如果你識得講日文、日本係一個好方便自由行嘅国家、因為喺網上嘅資料非常多而且非常有用、但唔識日文我都幫你唔倒。我介紹嘅網業多數都係日本網業、所以通通係日文、有人曾経問我呢個點解嗰個字咩嘢意思。縦容一個就會越嚟越多人問、所以殺一警百。

⑥請自重言語！曾経試過１・２位問嘢問得好軽挑、我覺得好無禮、好似係同我識咗幾十年老友咁。我接触咗東洋文化有差唔多廿十年、唔覺唔覺比佢哋感染咗D「上下関係」或者「礼儀作法」。雖然香港係無日本嘅所謂「尊敬語」「丁寧語」、但第一次喺人哋個Blog度問嘢、都態度好少少啦。

⑦唔好問我建議行程！去旅行想玩D嘜嘢人人唔同、我建議你去嘅地方未必係你想去嘅。即使你自己計画咗行程、都唔好問我順唔順路、呢度唔係香港D路咁簡単、唔揸車嘅我嚟講邊度都係差唔多、即使我個私人司機都好難答倒。既然係「自駕遊」就一定對方向有信心、而且都係睇過地圖先計画行程、有車無邊度去唔倒嘅、自己攪掂啦。

最基本嘅我写晒出嚟、一向有交流開嘅Blog友梗係可以随便嘜都可以問啦！但唔識嘅就唔好意思喇、買本「新假期」、或者去香港嘅「日本旅遊協会」、又或者識返個會講日文嘅朋友、又或者去一D好鐘意幫人嘅Blog、一定有人可以幫倒你！我写呢個Blog唔係諗住幫人「自由行」o架、我純粋係為「自己満足」啫♪～(￣。￣)。