輪到右面喇

覆診見H醫生, 建議我做埋右面腦瘤, 4個月前係做左腦, 今次輪到右面.

未決定做, 醫生亦都未安排約期做, 不過都係拖住先, 下次覆診就要做決定.

聽完H醫生既意見, 其實都幾唔開心, 感覺前路好灰.

H醫生比較保守, 神色凝重, 會講最壞既情況, 提醒我預左係咁咁咁, 都冇辦法啦, 保命緊要, 其它功能都要預左係冇架喇.
L醫生會輕鬆d, 會樂觀少少, 佢會講: 做多d練習治療啦, 幾個月後就會好d, 可能會比手術前更好添, 唔洗太担心.

到底應該從最壞果個情況打算, 以免希望越大, 失望越大丫?
定係仲應該存有少少希望, 等個人開心d, 覺得前路冇咁灰暗好呢?

做埋右面手術之後, 聽野方面, 肯定係會total loss架喇, 連而家僅有果dd聽覺都會冇埋.

到時要面對完全寂靜既環璄, 行雷, 冧樓, 爆炸... 都唔會再有聲喇.

幾年前係學過唇讀, 學到中班添, 不過我覺得睇人口形又冇乜勁左喎. 如果連小小聲音都冇埋, 真係好難睇人口形架. 邊有電視劇集度, 講識讀唇果d角色咁勁丫. 隔住條大馬路, 望住對方側面, 都睇到佢講乜, 做戲啫.

手語都學埋高班喇, 又係好似學得半桶水咁既, 死火.

到時, 可以安裝一個叫人工電子耳既儀器喺腦入面, 可幫助重度聽障, 或神經性失聰者(即係我), 獲得可用既聽力. 好似唔錯哩? 但H醫生話, "唔係太有幫助囉, 你聽到既聲已經唔係以前聽到既聲, 每種聲都只係好似一個機器發出黎既聲咁, 唔能夠分辨到係人講野既聲, 定係其它雜音架 ........ 咁如果你想, 都可以同你裝既."

唉, 我本來都仲對個儀器有少少聽覺希望, 而家又幻滅左, 灰.

果晚臨訓前, 向天父祈禱, 求佢唔好離棄我, 帶領我走每一步, 講完, 就突然哽咽, 眼淚不停流出黎, 我感到聖靈喺我身邊, 仲同我講, "我唔會離棄你".