今日大陸遊蹤

見阿妹去o左婆到住, 老豆去o左工幹, 阿媽冇人陪, 就同阿媽一齊去大陸食野, 去o左四海一家食buffet, 唔錯唔錯

間四海一家係益田假日廣場, 食物冇番愚總店咁好食, 不過冇大所謂啦, 自助餐一向我都唔預好食, 而且午市$118 人仔, 夫復何求? 都食了唔少野, 天婦羅, 燒味, Pizza, 中菜等都試過哂, 阿媽仲犀利到攞到魚翅撈飯

食完之後行o左個廣場一陣, 成個廣場都係名牌野, 冇一個唔係鬼佬牌子, 我同阿媽都冇收穫, 成個廣場靜過鬼, 冇大陸人會係個度買野 之後去埋個度的Ole超市, 嘩d野貴到呢..... 係香港一開二的價錢, 不過靚就幾靚, 十足Citysuper咁

行到冇野行後就轉o左去萬象城, 萬象成比我的感覺好好多, 平民化d同埋多d野睇, 而且人流都多d, 又有平治車行, 一行到去就有部ML63, 誠意可嘉, 不過間野好似唔多開放, 最終都冇入去睇車

最後去o左一個真正平民超市, 佢叫人人樂, 不過又的確幾人人樂的, 因為個個買野都好似打仗咁, 我推住架車完全冇停過, 一想停前後左右都有人殺到黎, 好彩d大陸人比以前斯文好多, 而且自助形式的地方較多, 可以自己撈魚, 自己捉蟹, 自己"畢"生粉, 仲有大陸最興的自己攞膠袋揀蛋(但我唔知佢d蛋點返到屋企) , 頭兩項係香港都未試過

去到六點到返屋企, 今日雖然冇咩車睇, 不過都算比以前去深圳充實, 係碼唔使迫係東門老街陪阿媽睇女人衫同鞋

今日係萬象出面見到架換了軨的GLK, 比想像中型仔好多, 有G-class相, 唔知香港幾時有呢

雖然去o左十幾次深圳都搵唔到車仔舖, 但我覺得冇香港咁悶, 而且佢地的廣場真係靚過香港好多好多, 大飽眼福