車仔麵~榮記 @ CWB渣甸街

        
                   (坐係我對面o既妹妹仔, 食佢所謂o既"牛奶粉" (即係河粉) 食得好滋味~! )

話說有日去搵中醫, 佢叫我食多o的豬皮....
"豬皮?!  車仔麵o個o的?"
"車仔麵有豬皮o架咩?!"
"o下? 我剩係知車仔麵o既豬皮咋喎~"
"(眼碌碌諗o左陣)......唏, o個o的炸過唔得o架, 我意思係食多o的骨膠原..."
"呵! 骨膠原..." (我無諗住食豬皮o黎補充骨膠原喎! )

經佢一提, 我就好想食車仔麵...  所以尋日自己走o左去CWB食
曾經有好一段時間, 我生活中失去o左車仔麵, 因為搵唔到一間好味又可靠o既麵檔!  後尾CWB地膽粉粉介紹我榮記.... oh~! You all come back to my Life! 

榮記除o左一間係渣甸街, 仲有一間係糖街(CEO對面)  到而家我都唔係好肯定佢地係同一間店, 定係有人抄襲...佢地兩間都九成九似, 而且味道係一樣喎!   不過糖街o個間就成日排隊, 仲要係門口諗定食咩, 話比呀哥知, 佢先比位你.... 你都咪話唔惡!  我都係比較鐘意去多女人(雖然佢地都粗魯) o既渣甸街店!

墨魚頭, 魚腐, 大腸, 牛根....每個人食車仔麵都有自己o既心水!  我都好想試其他餸, 不過每次去到都係忍唔住叫返o個幾樣: 雞奕尖 + 蘿蔔 + 豬紅 + 油麵

雞奕尖 - 滷水味, 骨肉都煮得好透, 好肥美 (註: 佢o地有淨尖一碟, 不過我覺得跟麵好食o的)
蘿蔔 - 佢o地o既白蘿蔔永遠都係咁水, 咁甜...真係好奇怪
豬紅 - 唔知點解會食, 因為以前不嬲都唔食....但食開又幾好味, 所以繼續叫
油麵 - 其他地方食過好多油麵, 都好硬好膠, 或者係有陣油膩味....真係好難食!  不過呢度完全無以上問題, 仲好軟滑!
時菜 - 叫麵跟埋, 而家係通菜 (無咩特別), 有時係西洋菜, 夾埋個湯低就十個好味!!!

尋日仲係店見到幾個賓賓, 咦, 都幾識食喎.... 佢o地仲有英文Menu, 呀哥又一口流利英語幫佢地落單, 香港果然係國際城市!!!  早知有英文Menu, 我上次帶竹昇表妹去時, 就唔駛成個餐牌由頭到尾讀o左幾次啦!  (竹昇表妹仲話, 呢個麵係我帶佢食過最好味o既...唔係掛!)

好多朋友 (好可能包括睇緊 blog o既你) 都比我半帶半拖, 陪過我去榮記!   你係咪其中一個!?