甜的毒藥

朝早操練完, 大搶同升降台就上左山去做攀山拯救, 間局得返泵車同鋼梯。 呢個時候又響鐘, 一定走唔甩啦, 1級火警, 自動報火警鐘, 2 架車去晒。 原本都不以為意, 但係去車途中, control 通知我地話有幾個call, 一聽就知有料到喇, 打醒12分精神。 一去到附近, 遠遠都望到大片黑煙攻出來, 但係由於鋼梯要係外圍stand-by, 而升降台同細搶都係其他區來緊, 即係話, 我地一個車更要做晒搶水同上樓救火既工作。
一落車, 大家都好有默契, 二話不說就拎齊架生做野, 作為尾位既我當然係去街井攞水同開喉去大廈FSI 啦。 開開下喉, 個看更係咁捉住我指住條樓梯話係上面, 我夠知上面火燭啦, 大佬咪阻住晒啦!! 佢又緊張又發晒茅咁, 唯有一個唔該推開佢繼續開喉啦…
開完喉, 即時咩B.A.上樓啦, 跑到上去都係咁扯氣, 開左門, 又唔係好大煙喇喎, 見師兄唔戴B.A.咁我都唔戴啦, 條氣都未順, 吸多2 啖先。 咦?! 乜d 煙甜甜地既?! 師兄見我係咁索, 師兄即時話, 咪咁大力索呀, 你睇下你個鼻!! 用手指探一探, oh… 好多黑色既灰…
現場係一間裝修緊既廠房, 煮熱d 蠟青用來舖地下, 結果煮到過火燒著埋, 好采因為要準備舖地, 所以冇乜雜物, 加上爆左花灑頭, 好快就救熄左個火。 快快手搞掂d 手尾make-up 離場。
收好晒喉, 上車等, 4個人係咁用紙巾挖鼻想清返鼻入面d 灰, 唔知d市民會唔會覺得d 消防佬好噁心呢?! 返到局都仲係咁咳返d 帶黑色灰既痰, 成日覺得咁好傷, 不過冇計, 返工就係咁架啦… 

-----------------------------------------------------------------------------------------------
新來左幾件爆破工具俾我地試用, 但係咁大件咁又重, 實際又係唔係咁好用呢?! 點解唔買d 輕d 既架生反而越來越重既?! 真係唔係好明…

-----------------------------------------------------------------------------------------------
放工揸我既愛驅回家, 停燈位, 俾個的士佬kiss左一下patpat, 好采人車都冇事。 算佢好采!!