補報火警(Late Call)

補報火警(Late Call)--一般係指現場曾經發生火警但已自行熄滅或已被撲滅, 消防及警察需要到現場作出調查。 由於理論上現場火警已經已經熄滅, 因此唔會有全套一號火警既人手去做, 而只需要主任級人員帶隊作出調查。

噚日做左一單比較特別既Late Call, 轉call 係由漁護處轉介俾我地既, 原本係一單山火, 但後來轉為補報火警。 到場後發現一間已經荒廢既小屋完全焚燬, 由於間屋已經燒左好長既時間, 所以所有用作支撐既木柱都倒塌晒變晒做大炭…… 即係話, 現場仲係有火源可能會再燒。 但係我地既人手得4個, 現場冇水連山草拍都冇, 結果我地只好諗下辦法啦。 如果由得佢, 夜晚一定會再燒過, 話唔定蔓延到成個山頭都係, 到時真係收唔到工喇……  週圍撲水, 終於走到去d 荒田度搵到2桶水, 有水先有得做野。一邊整熄d 火, 一邊搜查現場有d 咩燒左, 邊度係火頭, 最緊要既係聞唔聞到bbq味… 明唔明點解?!
安全起見, 逐塊鐵皮搬起來睇清楚有冇可疑同奇怪野, 結果一搞搞左3個幾鐘先收隊, 吸左幾個鐘頭煙, 成個鼻都係灰, 最失策係冇個口罩係身, 咁吸法遲早死……