關於損毀的陪償知識

無論做甚麼工作，員工都一定有機會接觸公司資產，小如文具、大至汽車，當中總有不小心弄壞的機會。在老闆立場，員工整爛，當然要賠。但讀者Susie的老闆卻要她賠償差不多是她人工1.5倍的極昂貴水晶杯，又說要在她人工扣，到底Susie是否真的要負全責？
員工打爛公司財物，是否要負上全部責任？「街坊工友服務處」勞工事務幹事麥德正就這樣說：「根據香港法例第57章第32條，員工如果唔小心損毀僱主或公司擁有物品，而呢損壞或遺失，係因為僱員疏忽或失職而引致，僱主就有權可以從員工薪金中扣除工資。不過僱主每一件損毀物品事件中（即可能一次打爛幾樣物件都以一件事計），所能扣除僱員工資金額，若物件總值$300以下，就只可索取該僱員相等價值賠償。若被損壞或遺失物件超過$300，無論件物件值幾錢，僱主最多亦只可索取$300賠償。而僱員任何一個工資期內被扣除款項，亦唔可以超過佢該工資期內可獲得工資四分之一。而以上兩個條件，當中又以較小金額作為賠償準則，即以一個月薪$1,000鐘點女傭講，若佢打爛一件價值$300物件，因佢工資只得$1,000，以賠償較少原則，佢只需賠上工資四分一，即$250，而非$300。」而Susie的個案，因她月薪有$3,000，工資四分一是$750，所以她要賠償上限$300給僱主。

借用物品先通知上司
麥德正又補充，還有一種較複雜的情況。「好似你傳媒行業，經常要借勁貴名牌衫、鞋畀明星或模特兒，有時整爛，公司又唔肯幫僱員賠時，就要睇個記者係咪用公司名義借。」所謂用公司名義，其實只要上司知道員工會去借，或是上司叫員工依某工作項目（例如做一個金色鞋topic）去借，那員工就是在執行公司命令，這時公司要承擔所有責任。「我建議員工可以借之前同上司講清楚，只要上司知道，就代表公司要負責，之後就算整爛對$3,000鞋，員工都只需要賠$300，如果僱主僱員薪金度扣減超過$300賠償金額，僱員就可以去勞工處追討欠薪。」
呢條法例似乎對僱主不利，麥德正話，僱主惟有幫貴重物品買保險，保障自己。「都有例，個僱主話個僱員故意打爛，但呢樣好難搵到證據，正式口同鼻拗，所以僱主若屋企有貴重物品，又或者要員工借一些貴重物件，最好都係買保險先。」