O靚模進化史 (無圖)

O靚模進化史

論O靚模, 以我年紀, 應追溯至上世紀80年代, 當時初踏足社會, 男生談的玩具多是SLR, 自費影Model, 如有拍拖關係, 更有固定的私家中模, 概念引申為日後O靚模的蓬勃發展藍圖!

至 90年代, 倪震本Yes中的”城市驚喜”, 應可定為O靚模1.0測試版, 城中媒體爭相仿傚 (更走火入魔者為一系列的"情"字頭漫畫), O靚仔爭相傳閱, O靚妹就爭相模仿, 點模仿? 各位有否逢周六日, 在九龍/香港公園, 見到三五成群化晒妝的美少女(港女前身), 擺出各種pose, 此視之為O靚模2.0版, 而這版本是要自費的, 約$100包菲林+沖晒+4R相册!

千禧年, 踏入數碼時代, 部分年輕人產品都以少女Model作招徠 ~ 硬照, CG look, Road Show等, 而數碼相機開始流行, 造就一眾少男拍友升喱為龍友, 超模/名模無乜機會影, 咪周街snap d CM girl, 而眾準O靚模更在各攝影網站自我推介, O靚模版3.0正式普及!

近數月, O靚模指數牛了廿幾三十年, 各大O靚模發展商看準時機, 借天時(熱), 地利(書展+動漫展), 人和(下至1x, 上至8x嗰班), 將O靚模指數大幅夾上, 殺淡友, 推出終極版本, 使到全民皆O靚, 更造就一連串的創意產業獲得可觀的收益!

以古鑑今, 香港自回歸後, 有邊d嘢是last得耐㗎! 所以我大胆預測, 遲些可能會有周瘦娜全身解構版, Angela woman 畫冊, Kama X-ray 寫真, Stephy vs Teresa 互炳遊戲光碟…再遲些…天曉得!