二歲半喇~~

5-10-2009

家希今日已經2歲半喇~~ 過去呢半年發覺家希除左長大左識多左好多嘢外，亦覺得佢比以前痴身左，可能多左時間湊佢，加上暑假前後都有好長時間冇返學，24小時對住又點會唔痴身丫~~

呢半年，家希識左D乜？

● 戒左片 (夜晚未完全可以戒) - 由以往大便時點都要用片到 e+ 識自己去拎坐廁；除褲；坐下痾大便都可以自己做，當然最後D手尾梗係我地幫佢攪掂啦~~

● 識自己食嘢 - 基本上佢2歲前都已經識自己舀飯食，但2歲後就識用筷子同匙協調一起用。可惜係好景不常，佢食飯 e+ 就越來越慢，越來越多籍口.......。

● 識幫手做一些簡單的家務 - e.g. 媽媽收左衫後幫手將D衫拎去床上；開飯時 mami 叫家希幫手拎筷子同佢自己既食具、又會幫手擺櫈仔；識將垃圾掉落垃圾袋內；飲完水識將水杯夜入廚房；識將污衣放入污衣藍內....

● 自理能力高左 - mami 會叫佢將飲完奶既奶樽放入廚房；識自己穿鞋及除鞋襪，之後放回放鞋位置；自己孭書包拖住 mami 行返學校，行多左，抱小左；玩完的玩具同書本 (要叫) 就識放回原位

● 理解力高左 - 明白好多野，有時 mami 抱佢抱得倦比 daddy 抱，佢會話：『Mami 你倦呀？隻手冇力呀~~~』；知道好多物品既用途；開廳冷氣時，會識幫 mami 將所有門關上；出街前，會自己幫 mami 將風扇、電視等關上，但如果 mami 做左呢？佢會開返佢自己再關一次.........。所以有時家希都有自己既脾氣，好固執，有唔願意既野迫左佢做佢會喊，之後會話：『你下次唔好咁喇.....』 

仲有D咩呢？一時間又記唔起咁多添~~ 黎緊我地要搬新屋，唔知搬左之後佢會唔會唔習慣呢？