毒奶粉禍害

2008年9月22日

昨晚聽到 6:30 新聞，話雀巢金裝助長奶粉 1+ & 3+ 都有三聚氰胺，嚇到 Mami 同 Daddy 都唔知點算，因家希由出世到 e+ 都係食雀巢奶粉的，而上星期學校還發給家長一封通告，說已問清楚雀巢公司有關三聚氰胺成份問題，雀巢公司還向校方發出聲明所有奶粉不含三聚氰胺.........。定下來後 Mami 立即叫 Daddy 有理冇理拎晒 D 落奶粉去買開果間藥房換其他牌子奶粉，好彩本來昨天早上還打算多添一罐雀巢，但因抱住家希冇手拎所以打算遲多2天先買，點知黃昏就發先呢單新聞。Daddy 就加錢換了日本雪印回來了~~

我地怕家希轉奶粉唔習慣，所以事前 Daddy & Mami 已多次提醒家希要轉奶粉。去嫲嫲家食完飯睇埋家好月圓大結果回家後，Mami 再一次拎埋罐奶粉認真地再同家希講多次轉奶粉事宜，估唔到家希一路企着靜靜地聽 Mami 講解，一路點頭表示明白，當 Mami 講完後家希從 Mami 手中抱起罐雪印奶粉攬住，跟手行去台面想放下，但因為唔夠高而由 Mami 代勞。家希有咁既表現，Mami & Daddy 都覺得好開心~~

到真係食奶既時候，家希如常的在地下瞓係度等食，當 Daddy 送上新奶奶時，家希先點一下頭，好像示意知道明白奶奶轉左牌子，之後就如常地飲，當然始終都係新奶奶有唔同味，家希好叻佢冇扭，只是食得比平常慢，同當 Mami 望住他飲奶時，他會點頭同指住個奶樽話奶奶..... 最後係食剩 1 OZ。Daddy 就試下味，Daddy 話雪印這款奶的味道有點好像家希 BB 時飲的能恩一樣味道。大人會感到難飲。

到了今早，家希都係好似昨晚一樣照飲雪印，又係一路食一路講奶奶........ Daddy 唔放心，怕真係會有奶粉恐慌潮，所以叫 Mami 再多買 2 罐。Mami 因要開舖，叫了表姐代勞，表姐要去 2 間藥房才買到 2 罐日本雪印，真係唔該晒表姐！

今早食物安全中心又話驗左雀巢冇事，真係究竟有事定冇事呢？消息太亂了~~ 幸好，家希學校會跟進此事，因學校都係用雀巢的，現在暫時會全面停用改飲豆漿，直至攪清楚整件事會再通知家長。真係辛苦晒各位老師同學校職員了。唉！~~希望唔好再有呢D 事啦~~ 小朋友有事大人會好傷心！我都要準備定可能要帶家希去驗一驗身。