奇難收症?!!!!

做左病室唔覺唔覺都好幾個月,新症真係收左唔知幾多次,自問仲有好多進步空間,但基本野都已經問得算唔錯喇,今日竟然收左一個新症,收到我頭都痛......

其實,新收症唔算難,但要0係放工前二十分鐘先開始收,同時有四個姑娘不斷催促,兼且收症既對象係一對極難纏既母子,就真係有一定既難道......

話說今日下午兩點二十分左右,姑娘叫人上心臟科接個新症落黎,我已經周身唔得閒,又要換片,又要做QH,但係,十五個人企左0係護士室,竟然可以無一個人去應姑娘!好啦,最後又係我上左去,既然接得落黎,就要收埋症,但因為0係心臟科實在等得太耐,落到黎0的姑娘超緊張要我快快收好個症,但呢個新收既中年女人都唔知係唔係耍我,由頭到尾,全部問題我都最少要問佢三次佢先識答我!!!我真係無痴脷根架,亦都無懶音,但佢就係心不在焉!

佢之所以有咁既反應,主因在於佢話佢有糖尿病!!!由我接佢落黎0個一分鐘開始,佢已經不斷同我講,佢最後係十一點食過野,一直到而家都仲未食,再唔食佢就要暈!但係無辦法,因為姑娘話安排左佢夜少少做心導管手術,所以佢要繼續禁食,我已經一而再解釋俾佢知,但佢就係好堅持: [ 再唔俾我食野我就會暈! ] 唉,真係無佢辦法,每問佢一個問題佢就重覆一次要食野,所以,真係問到我好煩燥!!!!

精彩既仲0係後面,好唔容易問到佢有咩藥係一直食開既呢?佢竟然0係個手袋度拎左廿幾三十包藥丸出黎!!!我話:[ 唔....其實,我只要你一直keep住食既藥就可以喇.] 佢話:[係丫,呢0的我日日都食,食左成年架喇,你抄啦!] 我拎起黎睇,0的藥包括咩呢?真係嚇死人,除左糖尿藥,心臟藥,血壓藥,氣管藥,哮喘藥,仲有0的明目藍莓素,靈芝孢子丸,蜜皇漿丸.......等!!! 我話 : [ 呢幾隻我抄底啦,後面呢0的可以先收起.] 將所有一樽樽電視不停賣廣告既藥丸俾番佢,點知佢竟然話:[ 你抄啦!呢0的我全部都係日日食,你抄底俾醫生睇啦,唔係佢唔知架!] 我忍住0的火:[呢0的係保健藥品,唔需要架喇,你收番先啦.] 佢就命令我: [ 姑娘!又係你問我食開0的咩藥,呢0的我食左成年喇,而家俾你,你又唔抄,一陣又話我食左0的咩唔出聲喇!叫你抄你就抄啦!] 唉......無辦法,我是是但但都抄左幾隻啦,其間,急住放工既姑娘出出入入,不停催叫我收快0的,望一望我張收症紙之後,仲要串我係唔係第一次收症?知唔知呢0的藥唔使抄?唉......我梗係知啦,係佢地唔知個女人有幾煩0者......收咁多症都係第一次俾人串我 [ 唔識 ] ,有0的委屈0羅... 

好啦,終於攪掂左,仲以為我收左幾耐啦?一望個鐘,只不過係十分鐘!喂!!都算係咁啦!你地使唔使咁話我啊?我都仲算新人一個啦,有時真係覺得,佢地0的姑娘係唔係真係可以咁勁呢?就算對住0的咁煩既病人都可以用少過十分鐘收好一個新症,仲要無錯漏?真係好想睇下啊!!!!!

唔該!俾多次機會丫!雖然俾人鬧個心係唔舒服,但係,我唔會氣餒既,下次!我一定會有進步既!加油!!!!!!!