進註Chelsea後感 - 讚!

雖然只係得好細portion係海景, 但係已經令人好開心, 差唔多係落到地嘅大窗, 日間基本上係唔駛開燈, 而且個view都好開揚, 令到間屋感覺好寬敞, 夜晚又有迷人嘅夜景, 尋晚仲好好天氣, 見到國金同滙豐, 真係好想睇吓過年時d煙花會有幾大粒呀~   

個個朋友黎到都話張梳化okay, 其實個L-位可以一路放喺度, 事實上個廳唔係唔夠位擺, 只係我哋唔想用舊梳化, 又唔想block咗個view, 不過我哋都諗住張梳化會keep到五月先丟, 可能到時淨係唔要個L-位......

個厠所都幾大, 可以喺入面晾衫, 我哋買咗個天上野, 其實d料就真係一般質素, 可能因為出名咗, 要成五舊水, 成個放咗入個厠所度, 個位仲好fit添, 不過厠所入面擺野嘅櫃就唔多夠, d護膚品就一定要擺返入睡房, 而家都差唔多已經full晒~

廚房都okay喇, 雖然阿賤未係好習慣d火力同不鏽鋼, 但係都煮到飯架喇, 雖然我哋唔係好多野, 但係d廚櫃都已經擺得七七八八, 好在我哋買咗個晾碗碟嘅膠箱, 地方好用咗好多呀....d碗碟都買咗喇, 但係又俾人打爛咗一隻, 原來都幾難買架, 唔係度度都有得賣, 而且貨好少, 而家想買多一隻都冇呀~

個廳就更加冇問題, 有梳化又有電視, 只係差d minor嘢, 例如係blue-ray機同hi-fi......至於個working area就仲未搞掂, 雖然阿賤已經work緊, 但係要買嘅屏風同櫈都仲未有, 搞到連餐枱櫈都未有著落, 我哋得返呢三兩日乍......