布達佩斯遊記2009(三) - 完結篇

四月二十六日 (日)

今日傍晚我地就要離開布達佩斯了，於是我自發地七點起身，沖個靚涼洗個頭之後先至叫醒皮雅，之後我地食早餐、返房執好行李就去check-out，酒店亦都為我地預約好的士下晝五點半來到接我地去機場。

布達佩斯最吸引皮雅既係國會大樓，所以我地第一站係專程坐地鐵過對岸Buda，目的就係為左隔住多瑙河去影位處Pest近岸既國會建築物。我下圖揀左站在Buda望鏈橋而唔係國會大樓，因為之後我地會近距離睇國會大樓。

影左幾張相，我地立即坐番地鐵「過河」返回Pest去國會大樓。我覺得近睇同響Buda山上遠眺既國會大樓有不同味道。遊人可以入國會建築內參觀，但係一來要站在大樓外排好長龍登記，二來必須跟導賞團，時間方面唔太配合到我地既行程…所以我地排左隊廿分鐘就放棄離開了。

國會既一角：

國會大樓一旁紀念一面中間穿窿匈牙利旗幟 - 故事係發生於被蘇聯統治期間，當時匈牙利人民處於極權統治既水深火熱，佢地渴求自由民主於是示威兼破壞國旗洩憤，卻遭受到蘇俄軍方血腥鎮壓，坦克車駛入廣場…享有自由實在要付上好大代價 - 我呢一刻打出呢句彷彿太認真既語句，自己都覺得有點不可思議，因為我以前曾經有幾何嘗試去思考過享有自由既意義？匈牙利歷來受盡不同外族既侵略或統治，到宜家總算獨立起來了，但卻係用左多少既血淚去換取自由。人總有一d冇咩把握可以成功爭取到既遠大目標，但如果心裡面渴求、該目標對我地來講係具意義既，無論如何都應該要盡力爭取到底，不過過程中免不了要有好多付出、痛苦甚至犧牲。

布達佩斯街頭有好多唔同既銅像，當中並唔係純為美化市容，卻係有段段唔同既歷史或故事。例如站在橋上既呢位係匈牙利第一位民選總理(約為1956年)，當時佢奮力抵抗蘇維埃極權統治結果後當局囚禁、被殺並置於亂葬崗，之後在1989年後人為佢重葬於英雄廣場，並在國會附近為佢建立銅像作紀念。銅像彷彿在遙望國會和多瑙河。

聖史提芬教堂。正門上方用拉丁文寫著「我是道路真理生命」。

教堂內部頂尖。教堂供奉了皇帝既右手…因為要付入場費先有得睇，所以我地冇去參觀。

街角既另一個銅像…呢位我要再查下書先知道典故，因為之前冇讀到呢個肖像既資料。不過我估市內其實真係有好多銅像，故此或者旅遊書都不能一一盡錄。

我地又行番去靠岸散步了。鏈橋既一對石獅子 - 究竟佢地口內有冇舌頭呢？

鏈橋，背景是Buda - 大家仲認唔認得出Buda山上進行維修中既Matyas教堂同埋漁夫堡？

河岸旁邊的電車軌道旁，欄杆上坐著小公主銅像。銅像是跟真人一比一大小，小公主身後就是Buda既城堡區。

下圖係市內既中央室內街市，聽聞好好行，有好多食物可以買來做紀念品，而且熟食檔又平又正…可惜我地來到係星期日所以冇開，嗚嗚嗚~~~於是午餐只好去旁邊既Vaci Street遊客區(成街都係紀念品店)其求搵d野填飽肚就算了，我地食左魚同薯仔，冇影食物相因為麻麻地。

食完晏仲有大把時間先至夠鐘返酒店，於是我地坐地鐵向東面進發，再去遠少少睇多幾個名勝。

英雄廣場。眾多戰士肖像皆詡詡如生：

英雄廣場左面係美術館。

穿過英雄廣場後方，繼續過橋前行，邊行邊欣賞不同的城堡和古老建築。

由於時間太早，我地坐響公園慢慢寫埋明信片比家人，之後都仲有好多時間…行行下我地響地鐵站內見到廣告說隔左酒店四個站有一個商場，於是我地竟然去左行街！那個商場真係非常之本地化，三層高有好多店舖(有d似意大利)，好多一家大細來shopping呢，我地又見識到少少本地民生了，哈。皮雅響商場朱古力店內買左朱古力禮盒送比媽麻和公司同事。

返番酒店，先響對面馬路影番張酒店紀念照先。

我地既最後任務係要響臨上的士去機場前，幫襯酒店入面好出名、詩人作家最愛既New York Cafe，飲杯野見識一下 - 結果我地何止飲杯野，仲食埋甜品！由於店內有規距說唔准影相，我地當然忍唔到手，因為實在裝修得太靚喇，於是趁冇人見立即急急用手機影一下…

下圖係皮雅既朱古力蛋糕。我要左匈牙利海綿蛋糕，另外我地各自要左杯意式咖啡(附送兩件曲奇)，埋單只係港幣一百蚊多少少，我仲估會好貴，真開心！服務生仲好有禮貌tim呀~

係咪裝修得好靚先？好豪裝呀呵？

之後我地就坐的士離開酒店了。響機場check-in行李時遇上一大堆意大利人，又打尖又推又爭位坐又嘈，唉，「如果你假設大陸遊客冇禮貌，我可以告訴你意大利就係歐洲既大陸。」皮雅被佢既同胞夾硬坐左佢個位時好激氣地說。唉真該煨…我又要返回喧鬧既靴子國了。

後記

我夜麻麻寫呢篇遊記，宜家已快將凌晨一點了，其實已經累了，但係講起布達佩斯真係令我好興奮好難忘，是次旅程令我增廣見聞(老土但真確的說法，可惜我未遊覽晒全部景點)，而呢個城市俾我既感覺係好舒服：地方乾淨，物價低廉，交通便利，治安唔錯，當地人友善，即使係街上途人，只要我地企響度望地圖，佢地會自動走上前主動幫我地，而且我發現佢地係偏向寧靜既一群，但唔代表佢地冷漠。布達佩斯有豐富既古蹟、美景、博物館、好餐館足以吸引我既目光，而最打動我心則是市內那份恬靜樸實以及在旅途中曾經遇上友善知禮既人民。

布達佩斯尚有好多地方待我去發現、感受和學習，我亦誠意向大家推薦呢個地方，佢地既旅遊業實在值得大家支持：即使該國唔富有，但係佢地更窮都識禮、有骨氣。