"極速血拼" 星期六

以前都唔發覺自己原來係一個"心急之人"，就好似"講嘢大聲"一樣，都係「與生俱來」，無得變、又無得改。

星期六係阿B"大日子"，佢唔想特別慶祝，所以最後兩個人去左尖沙咀Shopping + 食飯 就算。

先係 H&M 試左條裙，印滿 藍色玫瑰 懷舊風 Tube Dress （到時入面唔係加件黑tee） $299

識我的朋友都知道，復古懷舊Style 一向唔係我杯茶。呢類衫睇好睇，但一個唔覺，好容易變娘，正所謂：「氣質搭唔夠」囉..........   

但點解要試？  其實呢條裙係 for 11月 "麥田" 影 「壩光」輯相用架！ 原本打算只帶件拖地Printed Dress，到時影沙灘用，但見 Official Website入面啲相，又開始心思思，要match 「壩光」懷舊的背景，又真係要搵復古款的衫先啱Feel。 

其實除左衫，首飾都要再考慮。

跟住同阿B行「百利」，極速訂造了一套Swarovski 首飾、一對米白色 沙丁料 婚紗鞋、2件。

呢套人手造天鵝水晶首飾，難得地取得阿B首肯，而試上身真係又Sharp 又Grand，相信襯婚紗、晚裝都無問題，最難得店主好好人，俾我地打占2個星期取貨。   到時用完後，又可以免費幫我拆開改款，全套頸鏈  連  耳環，訂造價 $965，約需時2星期。

而對婚紗鞋，訂腳訂造價  $480，訂造約2星期有貨。  鞋面有兩行閃石，Grand & Simple 的款式，好鐘意。再將原本3吋幼高踭，改做2.5吋稍粗踭，著得更加舒服。

最後係阿B 訂造了兩件恤衫，度身訂造價 @$350。 阿B竟然同 店主GARY 撞表、撞耳環喎！  所以訂衫之餘，大家又傾吓啲「錶經」咁。   最搞笑係，現貨件衫阿B竟然扣唔倒鈕，攪到面珠、耳珠都紅晒 So Cute。      阿B，睇黎你都係要的起心肝減吓個肚仔啦！

離開「百利」，同阿B 去左尖沙咀「韓國快餐」食 韓國餐，「特級牛肋骨肉飯」好味啊！

做左咁多嘢，都只係四個鐘時間，係咪「極速」呢？

嘻.........