店大欺客 vs 待客猶親

之前睇過Trinice Flowers, 但最衰自己遲咗confirm, 佢哋已經full booking, 所以要重新睇過.  有同事經常喺「繽紛」買花材, 所以叫我可以去睇下, 而且佢有9折卡, 應該可以平啲~ 上星期六去嘅時候超多人, 咩都睇唔到...

今日同肥魚和小肥豬再接再厲去睇過, 可能係平日, 而且又係4pm, 所以「繽紛」店入面只係得2-3個客人. 我哋一入去就問個嬸嬸店員拎花球嘅相簿俾我哋睇, 點知個嬸嬸全程黑口黑面, 指指枱面既一本相簿之後，就我有我地睇相簿，佢有佢繼續做佢枱面嘅工作，一啲都feel唔到佢有任何銷售既意慾, 簡略對話係咁嘅:

G :   (當我哋睇完第一本相簿之後問) 係咪得一本相簿架呢…??
嬸嬸 :   (好負氣咁答，眼尾都冇望我地) 係, 喺晒到架啦!
G :   (但係我哋見後面幾張枱仔上面仲有五六本….)

G :   咁花球幾多錢呀?
嬸嬸 :   寫晒係上面架啦, 小姐!
G :   我都知寫咗喺度, 我想知包啲咩嘅呢? (..........)
嬸嬸 :   剩係花球羅!!
G :   咁新郎襟花幾多錢呢??
嬸嬸 :   連埋架啦播!
G :   咁即係包幾多個呀??
嬸嬸 :   1個, 呢啲唔係包!! 而啲係連埋!!
G :     (當時, 我想問呢啲唔係包係咩呀?? 同埋佢本相簿有啲係花球連襟花, 有啲只係得個花球, 點知佢點計呀??....)

G :   我想問可唔可以牡丹配風信子?
嬸嬸 :   (寸寸貢...)其實我見而家d後生客人, 好流行上網睇咗款先落黎鋪頭既!
G :   但你哋website唔會show晒咁多款出嚟架嘛.....
嬸嬸:   (冇理我哋繼續自己講) 睇完網上之後, 啲客就好鍾意係A公司既網站睇左個款就拎去B公司到整, 仲會要求我哋照跟, 我哋都唔建議架啦, 到收貨時新娘見到唔多靚, 咪惟有"死狗"咁羅!!

跟住嬸嬸就拎起面前響起既電話聽, 同電話嘅客人就客客氣氣交代返單據上既野, 眼尾都冇再望我哋.... 亦完全冇覺得要講聲唔好意思又或者搵第二個同事招呼我哋.....

我當時同小肥豬聽到佢講"死狗", 真係覺得佢好唔掂, 當住個客講而啲"狗話", 係咩意思呀??

呢個時候肥魚都忍唔住起身話 「我哋而家係嚟買嘢, 我哋冇錢咩??? 你而家咩態度呀?? 似住店大欺客呀??」

我都係第一次見肥魚咁嬲&鬧人架咋....

鬧完「繽紛」嘅嬸嬸, 我哋就去咗同事介紹間"Les Belles Fleurs", 都係喺花墟嘅, 同事話佢哋啲花好新鮮, 而且喺蘭桂芳有開workshop教人插花, 應該有一定保證. Serve我哋嘅Maggie好有心機咁同我哋講個package內容, 而且全程係笑容滿面, 而且仲好留心聽我哋嘅問題. 價錢都OK, 包咗:

1 x 花球(歐陸花種)
2 x 新郎襟花
5 x 主婚人襟花
5 x 兄弟襟花
5 x 姊妹手花

而且仲會喺我big day當日送花球嚟我屋企, 最重要嘅係俾我哋睇到佢哋嘅親切熱誠, 同好有heart, 當客人係朋友一樣, 令我哋可以放心~~