小Tam的大使命中集 - The Healing Touch

由星期日開始, 心裡很難受. 反省過後, 醒悟過後, 不一定會風平浪靜, 反之, 波濤更洶湧.

好難得, 有一首歌可以好完整咁講出我嘅心情:

結果
(http://www.youtube.com/watch?v=Oi5gK15dbYI)
(如果可以, 一路聽, 一路睇, 效果唔錯.)

由我同神爸爸講我會love His people開始, 我仔細回想許多往事. 往往一件事情嘅發生, 若然關乎多過一個人, 就一定唔止關一個人事. 如果當中有出錯, 就一定唔止一個人錯. 我發現, 一直以來我嘅矛頭都只會指向對方, 由以前嘅出口傷人, 到後來在文字上針鋒相對, 我彷彿從來都無錯過.

我最大嘅問題, 係總將自己放到無限大, 往往急於發表自己嘅偉論, 唔太留意其他人表達嘅意見, 甚至係站亂歌柄, 令人地都唔想再講. 結果, 我唔知對方需要啲咩, 唔鐘意啲咩, 我就成隻盲頭烏蠅咁撞埋去, 自己撞死咗都唔知咩事, 撞倒人, 我痛時佢都痛.

但願別人沒看我 極力在逃避過錯
不敢想來日那結果
除非一張開眼錯事沒有發生過
奇蹟不可洗脫我 我是有錯

到有一日, 真係發現自己做錯了, 錯過了很多事, 也錯過了很多人. 別人給予我嘅傷害大, 或許我俾佢地嘅傷害仲大. 我心痛, 因為往往我傷害過嘅人, 就正正係我最重視最著緊嘅人.

不肯走前路更遠心中屈結誰為我心軟
唯緊握雙手來被你看穿
你有否想拋棄我這沒用懶理的寶貝
若你真出手相救只怕你他朝後悔

我難過, 因為我好懊悔. 每朝起身, 我話俾神爸爸聽, 我唔開心, 我後悔. 我好唔鐘意自己咁自高自大, 好唔鐘意自己咁唔夠觀察力. 我同佢講, 我好想改, 我唔想再傷害到我好關顧嘅人. 真係好心痛.

誰能漫天風雪學抬頭越過最崎嶇山丘
沿路鼻酸可否伸手牽你手
如若學謙卑再學回頭是你說我可得救
可我相信未必可白頭

聽到呢段, 我哭了. 沿路鼻酸了, 是否真的伸手了就可牽你手? 內心嘅感受, 邊個願意去明? 我嘅軟弱, 邊個願意去體諒?

試過出走心魔叫一刻侵占我心窩
受不起種種試探我疏忽於結果

呢個禱告, 我祈過幾多次? 每次我都想變好, 但係想唔等於做到, 有時候, 唔係自己唔想做好, 係有心無力. 就算真係努力做緊, 又有幾多人睇到? 又或者, 我特別想佢地睇到嘅人, 又會唔會願意去睇? 做到一陣, 又做唔到一陣, 跌倒後, 企起身, 又再跌, 仲痛, 仲灰心.

前路直通天國別回頭越過最崎嶇山丘
這天願將身心交託於你手
誰曾在伊甸裡面迷途在這天十指緊扣
心意歸向你服從愛你就有歸家的福氣
等到審判那珍貴日期

係今晚, 我決定放生別人, 亦同樣放生自己. 有一個人鼓勵我, "今日失去一個人, 是為要擁有另一個人, 可以係同一個人, 亦可以係第二個人." 係一個信心嘅功課, 到底我信唔信佢, 可唔可以係眼未見, 耳未聞之先, 先將自己交出去, 繼續向前跑?

望著別人在嘆氣 聽到天使頌讚美

當所有人都唔跑, 當所有人都叫你唔好跑, 但仔細聆聽, 原來我身邊有好多好多天使仔同我打氣, 好多好多好同伴陪我一齊跑.

小Tam, , 別再回頭望, 努力向標杆直跑.

p.s. 點解呢篇都叫"小Tam的大使命"? 唔去舊, 又點迎新? 唔拆毀, 又點重建? 等下集啦!