十七個月大啦!

過多一個月就歲半囉，時間真過得快！近來帶謙謙行街見倒其他父母時最常有的話題就係：你報左未？講緊係報Ｎ１（學前預備班），哈，唔係佢地講開，我呢個阿媽都唔知九月十月係報幼稚園的時間，因為我一向都諗住等佢三歲大先讀Ｋ１，冇諗過讀Ｎ１呢！但有時人就係好奇怪，當人人去讀時，自己又會有少少怕執輸的心態，有一刻真係有諗過好冇俾佢讀呢？但其後好多人話以謙謙唔怕生保，同人溝通不錯的性格來講（加上我全職湊佢），冇需要去讀Ｎ１，所以我就打消呢個念頭啦！但都開始留意不同幼稚園和參觀一下，因為下年的呢個時候就真係要報幼稚園了。

從今次事件，我開始理解到點解咁多家長會為子女報這報那，因為自己真係會擔心自己子女會落後他人，有時見到其他人會有少少比較的心態，時常都好想自己子女能識得多Ｄ。其實每個人都係獨一無二的，我相信我以後都要堅守自己的原則，唔好太愛比較，否則受苦的只係自己的子女。

講番小謙的成長，佢呢排成日俾人話大隻，但實際幾多磅我都唔知，等下個月番健康院先知呢！同時間，相對差唔多大的ＢＢ，佢個樣又細Ｄ，仲係幾ＢＢ樣，唔多似個歲半男孩呢，或者似我地啩？

睇吓佢日常生活，朝早大約八點幾起身飲奶，之後我會帶埋佢落去食早餐，而星期六日就有埋爸爸：

咁當然要俾Ｄ親子時間佢地啦（實情係我想偷吓懶！）佢呢輪唔肯食包，要食通粉，搞到我地都要食通粉：

另外，每星期一次同埋佢太婆去茶樓飲茶，佢好開心架：

又係每星期一次（六或日）搭車去街，宜家用輕便車算囉：

通常我地會喺佢食完午飯大約十二點幾出發，去到大約點幾，行行吓到兩點就會瞓左，咁就係我同老公千載難逢輕鬆撐枱腳時間：

近排買左張ＢＥＥＰ　ＢＥＥＰ　椅俾佢坐，佢好鍾意，成人拿出來坐俾人睇：

仲拍埋手呢，我情願佢坐呢張好過上梳化，好得人驚：

閒時又同菇Ｂ玩，佢手上的係菇Ｂ的玩具囉，都無分彼此囉：

下圖想表達兩樣野，首先就係佢對新鞋（朋友送，好靚仔架！），宜家要著呢對啦，因為其他全部太細囉，呢對都幾大架，成１４碼（日本ＳＩＺＥ），佢認真係大腳八。

另外，佢身後的新玩具又係人地俾架。話說我喺帶謙謙落街過程中識倒個媽媽（好難得架，因為大部份ＢＢ都係工人湊，有志同道合真好！），佢個仔二十一個月大。我地住得好近，咁尋日我地就上左佢屋企玩，嘩，佢屋企Ｄ玩具多到，拍得住玩具反斗城啊！謙謙去到都唔駛ＷＡＲＭ－ＵＰ就周圍玩，勁開心，又難得佢同個哥哥仔玩得埋喎，或者因為一靜一動啦，個哥哥靜Ｄ，但好叻仔，識講好多生字，謙謙真係要向佢學習吓至得。同樣難得係佢父母都係基督徒，真好啊！玩左成個半鐘至走呢，而上圖的玩具就係個哥哥仔唔再玩而送俾謙謙啦，真多謝佢地呢！希望第時多Ｄ機會一齊玩呢！

謙謙另一大個仔的表現就在今天，因為佢今早去打流感針。同佢大佬（但大佬菇兩歲先知驚）一樣，一去到診所都未見醫生就已經用條腿夾住我，唔俾我放低佢，哈！一見到醫生，佢未喊，但已眼濕濕，望都唔想望個醫生；咁醫生未打前就問吓佢有冇番ＰＬＡＹＧＲＯＵＰ，我話未呀，佢都唔怕生，遲Ｄ都得，醫生就話俾佢番吓，可以冇咁驚人呢（其實我心諗佢係見你至咁驚咋，平時天不怕地不怕呢！）。最後，打完喊左兩聲就走囉，希望唔好發燒啦！

總的來說，謙謙好多方面都成長好多，係講野差Ｄ，不過順其自然啦，急都急唔嚟呢，就好似學行咁，當佢十四個月大時，我成日都等緊佢識行，點知突然就識左，宜家佢直情想跑呢！講真，佢又唔係超穩，但又行得急喎，其他人都會話：嘩，佢走得咁快架？真係睇少陣都唔得！不過佢有樣野好，就係肯坐車。之前佢剛開始學行時死都唔肯上車，有時行得攰時要我抱就手都軟啦，宜家佢會肯喺玩夠後上車，唔再咁死纒爛打，咁我都冇咁辛苦呢！