朱古力自助餐

星期六特登走去尖沙咀朗廷食Valrhona朱古力自助餐, 真係未出發先興奮!! 為左呢一餐, 個個都skip左中午果餐留肚.

一入到去先知個buffet係響酒店lobby lounge, 燈光幾暗, o的枱同椅都幾矮, 即係如果要攞枱上面既野就一定要彎低身向前, 有點辛苦, 如果嘆杯咖啡吹下水就適合, 不過整體環境都幾舒服.

四周環境有點暗, 坐響o的軟淋淋既sofa度食飽會好想訓...............

講返o的食物, 朱古力食品包括: 蛋糕, 慕絲, 撻仔, 噴泉同曲奇. 全部放晒響兩張圓枱上, 個人覺得款式算幾多, 因為太多的話都根本冇可能試得晒.

除左甜點外, 每人仲有一份tea set, 咸點為主. 雖然用架上, 但食完可以叫waiter添. 最低層既三文治仔全部都好好味, 尤其係個ham sandwich, 中層既三文魚批蛋批好香, 但個烤鴨批就唔多掂, 超厚皮, 上層既朱古力鬆餅好正, 好鬆脆又唔怕甜, 但個小果撻就好似放左成日咁, 淋鬼晒.

呢度係兩個人既份量, 望落唔係太多, 但一諗到呢o的只係"前菜"就會覺得好鬼多.

由於冇理由食完甜先食咸, 所以我地解決左果三層野先, 不過食完已經飽左一半, 之後先斯斯然去攞o的主角.

慕絲......甜左o的, 不過其中有一款辣既幾特別幾好味. 撻仔......一般, 但面頭o的生果好食. 曲奇......白朱古力果隻幾甜, 不過夏威夷果仁好正, 黑朱古力果隻就唔怕甜, 但味道唔夠濃. 噴泉......我冇試, 但我地好衰係咁攞晒o的一串串既士多啤梨.

由於大家都食到飽左九成, 所以最後o的蛋糕都係攞幾件返黎大家分黎試食, 個個都係食兩三啖就停晒手. 三層慕絲餅, 超甜, 唔多o岩口味, 朱古力芝士蛋糕勁濃芝士味, 好香, 但大家實在係太飽, 所以個個都係食左一啖就頂唔順. 香橙朱古力蛋糕, 勁似積及橙餅, 好味! 最正就係個用100%可可做既特濃朱古力蛋糕, 好香濃, 又軟熟又唔怕甜, must try! 不過一個人食晒成件的話都幾係野.

呢件特濃朱古力蛋糕真係好正!

中途waiter仲俾左我地每人幾粒Valrhona朱古力同一小杯熱朱古力. 佢好細心咁逐粒同我地介紹係咩味道, 而且食完可以再問佢攞過. 最攪笑係其中有一款係白朱古力, 咁waiter問我地每款要幾粒時, 我地異口同聲話全部都要就係唔要白朱古力果款, waiter哥哥即刻話, 唔緊要啦, 你地要埋試下啦, 每款都試嘛, 係咪怕甜呀, 咁我俾住兩你地先啦 (我地總共有四個人), 不過最後我地都係冇人試到果兩粒白色既. 

由上至下: 白朱古力, 香橙軟心黑朱古力, 榛子黑朱古力, 茉莉茶朱古力. 粒榛子入面勁多果仁, 好好味.

杯熱朱古力好香, 好滑, 好rich, 飲一小啖已經覺得好似成口野咁, 同埋有少少漿住既感覺, 不過一定要襯熱飲, 唔係會慢慢凝固, 但真係好好味.

食飽飽飲埋杯咖啡後真係勁滿足. 埋單每人$230有找, 如果喜歡朱古力的話可以一試, 因為Valrhona既朱古力本來就唔平, 而且個buffet整體黎講都ok. 食完後我地個個都話起碼一個星期唔敢再食朱古力住, 因為已經一次過食左幾個月既量!

行左一輪街消耗左部分熱量後 (都唔知有冇五成), 本來打算夜晚去食咖喱, 因為見朋友介紹重慶大廈o的咖喱同o的烤餅好正, 但係同行既個個都話食完朱古力想食返o的淡少少味既野, 咖喱太濃怕食唔落, 咁唯有四周遊遊盪盪求其搵個地方.

點知誤打誤撞又俾我地搵到個正地方喎, 就係諾士佛臺啦, 由於我地幾個都唔知原來有個咁既地方, 所以就成個大鄉里咁四圍行四圍睇, 周圍既環境都好正, 間間餐廳都酒吧都幾好feel咁, 最後我地選左間意大利餐廳--PAPA RAZZI.

蕃茄麵包, order時仲以為只不過係混合左蕃茄而整成既麵包, 上菜先知原來係咁既樣. 賣相好靚呀!! 麵包上面有蕃茄, 芝士同黑醋, 好好味~~~

茄子薯蓉芝士球

由於現場燈光實在太昏暗, 影極都影得唔清, 佢並唔係一塊扒, 佢係餐廳當日推介既頭盤--無菇菇一碟 (其實係我唔記得碟野叫咩名), 中間果一隻黑麻麻既大磨菇反而唔夠四周o的小磨菇好味.

南瓜釀雞胸芝士燴意飯, o的飯好煙un, 同埋因為加左南瓜既關係好甜, 好快就被消滅晒.

最後仲轉場過左隔離酒吧啤一啤, 飲到中途落狗屎, 雖則我地坐室外, 但好彩完全唔怕淋到雨, 相反周圍有幾枱都要立刻搬枱或者走人.

落屎ing.................前面幾枱o的人走晒, 唔係, 應該係話企晒響我地面前, 阻鬼住晒......

食飽當然要啤啤佢啦!

hea hea的一天就係咁結束啦............