和味生日飯@和三昧

因為新居, 要返工的夜晚往往搞到成點先訓 (小妹過去習慣11-12點訓...)
如放假更會遲到2點幾先訓, 真係人都癲呀!!

故過去的週日, 既同朋友食生日飯, 亦係俾自己休息叉電, 由我拍板去左和三昧!
嚮往已久的日式鐵板燒, 原來座位真係咁有限, 難怪之前幾次都book唔到啦

是日serve我地的靚仔師傅~~

點了一個business set lunch for 2 ($480)
內容包括各式海鮮及肉類, 所以有新鮮檸檬偏用

先來胡麻汁蕃茄沙律, 清新又開胃!

煎鵝肝十分肥美, 外脆內嫩勁香口勁好食, 我又再一次殘忍啦!!

另外, 件多士又係香脆不得了, 唔係實在太多油, 真係好想吞哂佢!!

接著有清酒煮蜆, 蜆隻非常肥大鮮美, 好食!

北海道帶子 及 大蝦, 又係好鮮好美味~~~

有少少不捨將蝦頭讓俾壽星
而日本豚肉生薑燒, 有淡淡薑味都幾好食!

按要求做到五成熟的美國牛肉薄燒, 香嫩有牛味, 中間夾有蒜粒增加風味!

食到差不多尾段, 師傅開始炒飯啦~~

炒飯好飽滿, 粒粒分明又夠鑊氣, 唔差的
不過當然係海鮮&肉類更吸引啦, 所以好貪心點多左樣食物

午餐都會附麵鼓湯同漬物, 前者加入好多蘿蔔片, 清甜唔咸幾討好的!

貪心額外柯打的, 就係以下的巨型南非鮑魚, 上檯時仲呼吸緊, $100隻都抵喎!

燒成品 (唔要內臟), 非常鮮香可口, 美味~~~~

鮑魚撈飯, hehe

最後的炒菜及蘑菇, 又係清爽可口!

食完正餐, 店方安排我地去咖啡廳就坐, 享受咖啡/雪糕~

非常精美的牙簽筒, 我幾乎忍唔住想偷走!!!

我的熱咖啡&朋友的凍檸水

原來揀左咖啡就會冇雪糕...

但我訂位時, 已講明會買個心太軟 (和三昧冇甜品), 要店方襯返雪糕上
所以店方都免費送埋雪糕俾我地, 綠茶同芝麻味都好香好美味呢~~

最後, 想補充個心太軟係Beard Papa出品, 味道唔差, 不過店方冇同我叮返熱, 哈哈
anyway, 祝友人聖誕+生日+新年快樂, 亦祝大家新一年健康快樂, 日日有食神!!