擔心~

星期五中午, 老公打電話來話 sasa 發燒, 38 度. 叫 左 99 比退燒藥小鬼食, 再貼埋退熱貼. 一路諗, 小鬼無凍親0丫. 唔通出疹?! 到五點幾, 仲燒到 39 度. 本來今日約左班媽咪出來飯聚, 都無心情去啦~ 即刻飛的返去睇下小鬼.

返到去, 見到 62 攬實小鬼, 小鬼食住奶咀. 洗完手立即抱抱小鬼, 佢成個人興到火燒咁. 退熱貼已經無貼了,  99 話個退熱貼唔凍喎. 6 個鐘頭內用左兩塊.  既然退熱貼無效了, 做咩唔識搵條濕毛巾同佢散下熱呢? 果一刻, 個心好想喊. 同小鬼再量一次體溫, 39.3 度. 濕左條紗巾, 一路行一路同佢敷下forehead, 面, 手+腳. 落到去等的士, 我只可以一路深呼吸去制止住自己的眼淚. 去到診所 38.6 度.

小鬼一見 到醫生已經喪喊,  醫生都只可以草草咁幫小鬼檢查. 醫生話小鬼喉嚨有d 發炎喎, 開左退燒藥同感冒藥. 仲話如果第三日都唔退燒, 要返黎覆診.

成晚都訓得唔好, 小鬼仲因為見完醫生, 發惡夢添~~ 好可憐~ 成晚燒下退下, 我都無乜點訓, 要 keep 住摸下小鬼, 同佢抹汗.

第二日, 都係 keep 住燒下退下咁, 不過好在佢精神都唔太差. 係痴身d 囉.

食藥水, 小鬼都好願意飲. 無反抗.

成日要攬住最鐘意的被被, 行來行去. 又嗲下張被.

睇下小鬼個樣幾咁可憐?!