香港－－終於有Mr. Bean啦！

猶記得當年瘋魔一時既Mr. Bean有一集講述佢駕車到一個交通燈位，剛巧遇著紅燈，正在等候之際，冷不提防隔離閃出一輛單車，停喺佢隔籬，然後騎者落車以推車形式越過燈位轉左，再騎上單車繼續前進；Mr. Bean見狀立即效法，落車以手將車推過燈位後轉左，再登上駕駛座若無其事地離開。

原來現實生活中既香港都有同類事件發生，話說昨晚經過屋企附近既一個燈位，啱啱轉咗紅燈，停第一位既係一架電單車，隨即見到鐵騎士跨下鐵馬，將車推上行人路，原以為佢係想泊車（因為喺屋邨附近既行人路隨意停泊電單車實在太普遍），心想，如果唔係紅燈所有車都停晒，佢會點上行人路呢？

正當我諗緊呢個題目既時候，見到佢既尾燈仍然發光，表示佢冇熄車（一般泊電單車只需要用手推，並唔需要用油，所以會提早熄車，以免錯手觸及油門而撞毁車輛或途人），說時遲那時快，佢已經從另一角位將車推離行人路，即變相為車輛左轉，跟住再騎上鐵馬繼續前行，那時才恍然大悟，原來香港終於有Mr. Bean，唔係，應該係Mrs. Bean。

如果將架小巴駛上行人路去避開塞車要被判危險駕駛，推電單車上行人路去避開紅燈又要判咩呢？