體驗北海道【5】

一早趁李太太未起身, 自己靜雞雞浸返次好寧靜嘅溫泉先~

早餐要出房食, 見佢抬住4大盒食物黎, 未食先覺得好飽....點知錯晒....d食物全部都好鹹唔啱我口胃!! 只係食晒舊西瓜, 好掛住Mister Dounts、我要食甜野呀!! 嗚......

原先行程係搭JR去余市駅d果園摘車厘子, 點知d車班次好疏落, 成個幾兩個鐘先一班, 唯有將佢掉到最後, 行晒小樽先去。由於早餐食唔飽, 諗住搵壽司食, 但10am太早全部未開。夏天+日光日白嘅小樽運河真係唔靚, 有d似羅湖過關時經過果條河.... 之後去參觀d硝子館、音樂盒堂, 好彩佢地都啱啱開門~

o黎小樽主要嘅目的係食甜品, 餓左咁耐終於都見到LeTAO、六花亭、北菓樓嘅旗艦店, 逐間掃, 唔怕醜的話淨試食都夠飽!! 開頭以為自己會最鍾意【LeTAO】, 因為佢門面同包裝都最靚, 但食齊幾間後, 最好食反而係【北菓樓】, 尤其是個[夢‧不思議] puff, 內有超香滑嘅爆漿吉士, 食完簡直感動到想喊!!!

我係用糖做, 而李太太係用飯+奶做。醫飽我個肚後, 輪到帶李太太去開餐。之前睇過烘燶麵包出嘅北海道繪本, 入面介紹日本人推祟嘅【魚真】壽司, 比專做遊客生意嘅【政】壽司平一半。搵路途中李太太問呢間壽司店係邊個介紹, 我話烘燶麵包介紹, 佢即場激到半死, 仲話我點解會信一個卡通人物講嘅野!! 事實証明
烘燶麵包唔會呃人架!!! 15件特上壽司只係2100円, 全部都新鮮好食, 抵~

之後搭JR摘車厘子, 果然係郊區, 搭幾個站都要半個鐘....一出站呆左...佢個網頁又話有專車接送嘅!!?? 方原十里唔好話車, 搵個人都無! 好彩同車有一家三口嘅香港人都諗住去果度, 咁我地就一齊搵路。沿途問左2個人都指住座山話果園好遠行唔到去, 後來經過一檔買車厘子嘅舖頭, 佢話佢地都有果園可以摘, 仲開自己部車車我地幾個上去。去到除左我地都無其他人, 果園個叔叔見我"矮得得", 但專跳起摘d高嘅黎食, 好攪笑咁開架剷泥車黎話剷我上樹頂摘, 果然樹頂係甜d 喎~