網誌分類：可愛三寶 |
Jeff：哥哥，今次到我哋做豬腳呀！
Max：咩豬腳呀？主角呀？
Jeff：但係點解去玩我哋都無得自由行嘅？
Max：第一．爸爸驚我會見海就跳；第二．班大人要開餐，我哋可以好輕易上到檯，所以爹爹話佢哋食完嘢至俾我哋自由行喎！
Jeff：咁我哋今日有咩節目？
Max：我哋今日遊船河，去南風灣玩！
Max：今日好熱鬧，十個大人帶住我哋十三個小朋友去玩！大人唔理，小朋友有白爹利嘅三寶，小白咖哩兄妹，白肥，莎莎小叮姊弟，同埋BuBu白白兄妹；加埋爹爹話越老越可愛嘅餅餅同埋我哋十三隻狗狗！
Max：我哋到未呀？好想游水水呀！
Jeff：我就黎暈船浪喇！
泊泊：邊有咁易暈船浪噃！Down係度咪無事囉！
泊泊：個海好靚噃！有啲屎意添！
MJ：屎意？唔係化？係詩意呀？
MJ：終於到左，可以玩咯！
深仔：你哋去玩啦！我唔like游水，都係玩下沙算喇！
惡爸：你乖乖哋跟住Irene姐姐，咪詐詐帝走去垃圾桶個邊，歡樂滿東華未到，唔使你表演食炭！
Jeff：嘜可以唔落水嫁？咁我都唔落咯！哥哥你自己去玩啦，我唔陪你喇！
Max：爹爹話我哋兩個同肥妹一樣要減肥喎！你想有啖好食就做多啲運動修修身喎！
Jeff：唓！家陣國際油價高企，我留返個大水桶係腰度，隨時用黎裝油賺外快買零食嫁！
橙船係莎叮一家；中間係惡Bu一家；藍船係白肥同佢爸爸肥嬌叔叔，白肥第一次主動四圍搵小朋友玩，仲要俾肥妹鬧都要搵肥妹玩，原來肥媽唔在場白肥可以咁外向嫁喎，爹爹話以後只約白肥去玩，叫肥媽自己留係屋企湊BB喎！
今次個沙灘無上年咁乾淨，又遇著潮漲，個沙灘好似細左，不過Buma話應該係因為落雨，海度啲垃圾沖哂上沙灘，所以好似好污糟；後來玩玩下潮退，船後面啲石本來好遠嫁，後尾變左岸邊石群！
Max：我今日多數自己玩，無痴班細狗狗，咁仲好，爸爸爹爹輪流陪我，沙灘度仲大把人搵我玩，使嘜去俾惡Bu鬧我吖？（惡Bu鬧完我即刻俾訓導任鬧，呵呵！現眼報！）
妹妹,泊泊:：爸爸，我哋好乖，好安全，你去玩啦，唔好捉我哋落水，今日游極都游唔到上岸，好驚呀！（惡爸按：梗係游唔到上岸啦，你哋俾我拉住條尾，邊游到上岸？哇哈哈哈哈哈！）
Max：爹爹好鍾意用呢個公仔同我玩，拋出海，然後同我鬥快游去執！爹爹讓賽，我有一半機會贏！
Jeff：我今日都有進步，唔怕水喇！（惡爸按：只係無咁驚咋，抱你落水時，你抓穿左我條泳褲，仲要係我最鍾意嗰條，好赤！）
肥妹：影完相好走喇！嗰邊有舊好大舊嘅雨雲漂緊埋黎！（惡爸按：好彩閃得快，一返到上船就落大雨，仲行雷，嚇到白肥勁吠，惡Bu都跟單吠兩聲，之後有探子回報，話橋咀島嗰邊有海龍捲，叫我哋速逃！不過我哋好彩，無遇到海龍捲！）
玩完之後，電召客貨車返屋企，點知個司機遲到半個鐘，攪到我哋兩兄弟趕唔切去美容店沖涼．爸爸就帶我哋去爹爹個惡家寨沖涼，攪到成十二點幾至幫我哋五個洗完白白，人同狗都攰到失去知覺咁滯！
第一次到惡家寨留影！
Sharon 2009-05-10 20:05