令人回味的三天

剛剛過去星期五六日，真係好開心~ 因為好耐都未試過同愛人一齊過返d "拍拖"嘅日子喇!! 而家諗返都好興奮....

星期五

星期五中午一個人去左佐敦買布，去之前就到一間叫 "Star Cafe原居民"餐廳食lunch。記得呢間餐廳以前係晌尖沙咀。話說以前自己做緊OL時候，愛人有時候都會約我晌呢間餐廳度食晏，雖然地方細細，但情調都唔差，最緊要係食物一流~~

自從佢地搬左去佐敦，都少左去食喇!! 今次難得經過所以去光顧下。同樣遇返果個經理(唔知係咪老闆?)，一入去坐低，佢就同我講:「我比杯暖水你飲好嘛?」..嘩~~果然貼心! 我見其他人都會問一下要凍水定暖水，不過佢就唔駛問都知我會要暖水，利害~~

我叫左呢個煎焗鴨胸紅酒汁。我order呢個餐時，佢建議我要全熟會好d喎!! 初初都怕會唔會好鞋，點知出奇地好嫩好多汁，外皮又香脆，真係超水準!!

食得飽飽之後，急急腳買完野就要趕返公司上堂喇!! 教完班接住就要試妝，好緊湊添!! 原本夜晚都要試妝，不過客人臨時改左期，所以終於可以下午7點前收工。

我一收工就趕去官塘接老公喇~~ 好耐冇等佢放工，佢不知幾開心!!  佢仲話一早買定戲飛同我睇9點半!! 我地先去左和花亭食sushi，好耐冇食喇!! 好好味!! 食飽飽就去睇戲喇~~ 不過當我知道愛人想睇呢套戲時，都比佢嚇親呀!! 因為佢竟然帶我睇 "80分鐘死亡直播" !!

星期六

呢日下午又要返公司教化妝班，咁啱愛人又係晌我公司附近工作，所以佢收工就上左黎接我，好開心~~ 

夜晚我地特登去左九龍城食海鮮，好正好好味~~ 我會晌另一篇再講.....-->我愛海鮮

星期日

呢一日又係見醫生日子。平時都係自己一個人去，不過今次愛人終於肯陪我去，仲要係一大清早8點幾就出發，辛苦哂~

因為太早起身，下午就返左屋企休息下先。愛人突然好想去游水喎!!  真係好耐冇游水喇!! 於是摷返件泳衣出黎先...  點知愛人話我件泳衣咁舊，要買過件新嘅比我喎!!  於是我地下午就出發去shopping喇!!

我揀左好耐，都好似唔多啱心水。愛人仲好勤力咁同我一齊揀....揀得好辛苦先揀左兩件去試身...不過都唔多啱。

正當我從更衣室想走出黎時，愛人竟然同我講，話揀左一個款，叫緊個sales攞比我試喎!! 好啦~ 睇下你揀左d 咩款比我....

點知...出奇地好睇喎!! 又可以遮到我d缺點，估唔到佢真係幾有眼光!! 連個sales姐姐都話佢識揀喎!! 服左你~

呢一日終於完成我倆遲來的下水禮喇!!!